Cynllun Blynyddol Bwrdd Iechyd Addysgu Powys 2026/27
Rydym yn falch o gyflwyno ein Cynllun Blynyddol uchelgeisiol a realistig ar gyfer 2026/27, sy’n cydnabod yr heriau sy’n ein hwynebu ac yn ailddatgan ein hymrwymiad i gyflawni gwelliannau go iawn a pharhaol mewn gofal iechyd i’n poblogaeth.
Fel erioed, rydym yn falch o’r gofal a ddarperir gan ein staff ymroddedig, cydwybodol a diwyd, sy’n parhau i’n hysbrydoli. Mae ein ffocws ar ansawdd, perfformiad a llywodraethu da yn parhau i fod yn ganolog i bopeth a wnawn, ac mae'r Cynllun yn amlinellu'r safbwynt cytbwys rydym wedi'i gymryd ar draws y meysydd hyn yn ogystal â chanolbwyntio ar adferiad ariannol. Rydym yn wynebu heriau sylweddol sy’n cyfrannu at sefyllfa ariannol ddiffygiol; fodd bynnag, fel y nodir yn y Cynllun hwn, mae gennym ddealltwriaeth glir ohonynt a chamau clir i’w datrys ar frys.
Mae'r camau gweithredu hyn yn seiliedig yn rhannol ar argymhellion yr adroddiad allanol uwchgyfeirio gan Grant Thronton a Phartneriaid. Cadarnhaodd yr adroddiad fod gennym afael a rheolaeth gadarn, a oedd wedi ein galluogi i gyflawni cynllun uchelgeisiol gyda lefelau hanesyddol o arbedion yn 2025/26; a byddwn yn cynnal y ffocws hwn yn 2026/27.
Er na fydd cyfanswm y cyfleoedd a nodwyd gan yr adroddiad yn ddigonol ynddynt eu hunain i ddileu'r diffyg sylfaenol, byddwn yn gwneud y mwyaf ohonynt yn y tymor byr i ganolig. Fodd bynnag, ni fydd camau gweithredu tymor byr yn unig yn ddigon i gyflawni cydbwysedd ariannol, nac i wneud y defnydd gorau o adnoddau yn wyneb yr angen, y galw a'r costau cynyddol. Felly mae'r cynllun hwn yn nodi ein dull gweithredu ar draws tair dimensiwn o 'Risg, Adferiad a Chynaliadwyedd' ar gyfer y tymor byr, canolig a hir.
Yn ystod y ddwy flynedd ddiwethaf rydym wedi gwneud newidiadau i ofal iechyd ym Mhowys i wella canlyniadau i gleifion ac wedi gwneud dewisiadau anodd hefyd wrth gomisiynu gwasanaethau. Rydym wedi cyflawni llwyddiannau o ran cynhyrchiant ac effeithlonrwydd, er enghraifft, o ran recriwtio a lleihau gwariant ar asiantaeth. Yn y tymor byr, byddwn yn parhau i ganolbwyntio ar effeithlonrwydd drwy foderneiddio ein modelau gwasanaeth, gwella ein trefniadau comisiynu a chontractio (yn unol ag adroddiad Grant Thornton) a dod â gofal yn nes at adref ar draws ystod o wasanaethau cymunedol ac arbenigeddau gofal wedi'i gynllunio.
Yn y tymor canolig, byddwn yn parhau i adeiladu ar yr hyn a ddysgom o'r holl newidiadau hyn i drawsnewid ein gwasanaethau darparwyr a'n gwasanaethau a gomisiynwyd drwy ein rhaglen drawsnewid 'Gwella Gyda'n Gilydd', gyda ffocws penodol ar ein gwasanaethau cymunedol, iechyd meddwl a gofal wedi'i gynllunio.
Ynghyd â ffocws o’r newydd ar iechyd y boblogaeth, mae’r gwaith hwn yn rhan o’n Llwybr hirdymor tuag at gydbwysedd ariannol a chynaliadwyedd. Mae hyn yn cyd-fynd â nodau cenedlaethol yn ogystal â'n Strategaeth Iechyd a Gofal leol, a rennir, 'Powys Iach a Gofalgar' a fydd yn parhau i fod yn strategaeth arweiniol i ni tan 2029.
Dr Carl Cooper, Cadeirydd
Hayley Thomas, Prif Weithredwr
Mae'r fersiwn lawn ar gael yn Saesneg a Chymraeg a gellir darparu fformatau eraill ar gais.
Am ragor o wybodaeth cysylltwch â Thîm Cynllunio BIAP drwy e-bost yn: planning.powys@wales.nhs.uk
Efallai nad yw'r ffeiliau hyn yn addas ar gyfer defnyddwyr technoleg gynorthwyol. Cysylltwch â ni yn planning.powys@wales.nhs.uk i ofyn am fformat gwahanol.