Brechlyn COVID-19

Brechiad COVID-19 Y Gwanwyn

Bydd Rhaglen Frechu COVID-19 y Gwanwyn yn dechrau ym Mhowys ar 1^af Ebrill 2025 ac yn rhedeg tan 30^ain Mehefin 2025.

Bydd pob person cymwys yn cael gwahoddiad drwy lythyr i dderbyn eu Brechiad COVID-19 y Gwanwyn yn eu clinig brechu cymunedol agosaf.

Os hoffech aildrefnu neu ganslo eich apwyntiad neu os hoffech fynychu eich apwyntiad gydag aelod o'r teulu neu ffrind, ffoniwch ein tîm trefnu apwyntiadau ar 01874 442510.  Rydym yn croesawu galwadau a gohebiaeth yn Gymraeg. Byddwn yn ymateb yn Gymraeg heb oedi.

Os ydych yn gymwys i gael dos y gwanwyn caiff ei gynnig rhwng mis Ebrill a mis Mehefin, tua chwe mis (ac nid cyn tri mis) ar ôl eich dos olaf o’r brechlyn. Os byddwch yn sâl rhwng mis Ebrill a mis Mehefin, efallai y byddwch yn gallu cael y brechlyn ym mis Gorffennaf. Os byddwch yn troi’n 75 oed rhwng Ebrill a Mehefin, byddwch yn cael eich galw am eich brechiad yn ystod y rhaglen – nid oes angen i chi aros am eich pen-blwydd.

Pwy sy'n gymwys?

Bydd dos y gwanwyn yn cael ei gynnig i grwpiau o bobl sydd mewn mwy o berygl os ydyn nhw’n cael COVID-19. Mae’r rhain fel a ganlyn:

• pobl 75 oed a hŷn;

• preswylwyr mewn cartrefi gofal i bobl hŷn; ac

• unrhyw un chwe mis oed a throsodd sydd â system imiwnedd wan.

Pam mae angen brechiad adeg y gwanwyn ar rai pobl?

Fel rhai brechlynnau eraill, gall lefelau amddiffyniad ddechrau lleihau dros amser. Bydd dos y gwanwyn yn helpu i’ch amddiffyn am gyfnod hirach. Bydd hefyd yn helpu i leihau’r risg y bydd angen i chi fynd i’r ysbyty oherwydd haint COVID-19.

Mae unigolion imiwnoataliedig yn fwy tebygol o gael salwch difrifol o ganlyniad i COVID-19. Os oes gennych anhwylder sy'n effeithio ar eich system imiwnedd, yn cael triniaeth imiwnoataliedig, neu'n cymryd meddyginiaethau sy'n cynyddu eich risg o haint, cewch eich gwahodd i gael eich brechiad COVID-19 yn y gwanwyn.

Sut byddaf yn cael gwahoddiad?

Bydd Gwasanaeth Brechu Bwrdd Iechyd Addysgu Powys yn cysylltu â chi drwy lythyr i roi gwybod i chi pryd a ble i gael y brechlyn. Mae’n bwysig dod i’r apwyntiad pan gewch wahoddiad. Os na allwch fynychu neu os hoffech apwyntiad yr un pryd â ffrind neu aelod o’r teulu, rhowch wybod i’r tîm trefnu apwyntiadau fel y gallant roi eich apwyntiad i rywun arall. 

Gallwch gysylltu â'r tîm trefnu apwyntiadau dros y ffôn ar 01874 442510 neu e-bostiwch Powys.covidvacc@wales.nhs.uk 

Mae mwy o wybodaeth am frechlynnau ffliw a COVID-19 ar gael ar wefan Iechyd Cyhoeddus Cymru. 

Gellir dod o hyd i wybodaeth am frechlynnau mewn fformatau hygyrch hefyd ar wefan Iechyd Cyhoeddus Cymru.