Gwasanaeth Ffisiotherapi Cyhyrysgerbydol (MSK) a Gwasanaeth Asesu a Thrin Cyhyrysgerbydol Clinigol (CMATS)
Beth yw’r gwasanaethau Ffisiotherapi Cyhyrysgerbydol (MSK) a CMATS (Gwasanaeth Asesu a Thriniaethau Cyhyrysgerbydol Clinigol) a beth maent yn eu cynnig
Mae ffisiotherapi yn helpu adfer symudiad a swyddogaeth pan fydd rhywun wedi'i effeithio gan anaf, salwch neu anabledd. Gall hefyd helpu lleihau eich risg o anaf neu salwch yn y dyfodol. Mae ffisiotherapyddion yn ystyried y corff yn ei gyfanrwydd, yn hytrach na chanolbwyntio ar agweddau unigol anaf neu salwch yn unig.
Mae rhai o'r prif ddulliau a ddefnyddir gan Ffisiotherapyddion yn cynnwys:
- Addysg a chyngor: Gall ffisiotherapyddion roi cyngor cyffredinol am bethau a all effeithio ar eich bywyd bob dydd. Mae hyn yn cynnwys agweddau fel osgo a thechnegau codi neu gario cywir i helpu atal anafiadau.
- Cyngor ar symud, ymarfer corff wedi'i deilwra a gweithgarwch corfforol: Efallai y bydd ymarferion yn cael eu hargymell i wella eich iechyd a'ch symudedd cyffredinol, ac i gryfhau rhannau penodol o'ch corff.
- Therapi llawdriniad: Lle mae'r Ffisiotherapydd yn defnyddio ei ddwylo i helpu lleddfu poen ac anhyblygrwydd, ac i annog symudiad gwell yn y corff.
Gwasanaeth Ffisiotherapi Cyhyrysgerbydol (MSK)
- Mae tîm Ffisiotherapi MSK yn helpu pobl sydd wedi’u heffeithio gan anaf, salwch neu anabledd trwy ymarfer corff, addysg a chyngor.
- Mae ffisiotherapi yn broffesiwn sy'n seiliedig ar wyddoniaeth ac mae triniaethau'n seiliedig ar ymchwil gyfoes.
- Mae Gwasanaeth Ffisiotherapi MSK yn darparu triniaeth ar gyfer ystod eang o gyflyrau MSK. Yn aml, dyma'r opsiwn cyntaf ar gyfer rheoli'ch cyflwr os nad yw'ch symptomau'n gwella gyda hunanreolaeth.
CMATS (Gwasanaeth Asesu a Thrin Cyhyrysgerbydol Clinigol)
- Mae tîm CMATS yn estyniad o dîm Ffisiotherapi MSK, lle gellir cynnal asesiad pellach, a gellir ystyried opsiynau fel delweddu (e.e. pelydr-X / delweddu cyseiniant magnetig (MRI)), pigiadau cymalau, ac atgyfeirio am farn ymgynghorydd.
Lleoliadau'r gwasanaethau
Mae Gwasanaethau MSK a CMATS wedi'u lleoli ar draws Safleoedd Gofal Iechyd Bwrdd Iechyd Addysgu Powys (BIAP) canlynol:
- Ysbyty Bro Ddyfi (Ysbyty Machynlleth)
- Ysbyty Coffa Rhyfel Sir Frycheiniog (Ysbyty Aberhonddu)
- Ysbyty Cymunedol Bronllys
- Ysbyty Cymunedol Tref-y-clawdd
- Ysbyty Coffa Rhyfel Llanidloes
- Ysbyty Coffa Llandrindod
- Clafdy Sirol Maldwyn (Ysbyty’r Drenewydd)
- Ysbyty Coffa Victoria (Ysbyty’r Trallwng)
- Ysbyty Cymunedol Ystradgynlais
Fel arall, mae clinigau dros y ffôn neu fideo ar gael ledled Powys, trwy'r feddalwedd 'Attend Anywhere', sy'n caniatáu i gleifion fynychu apwyntiadau o'u cartrefi neu rywle arall. Gall cleifion gyrchu cymorth digidol i gefnogi gyda’r dechnoleg.
Gweler y ddolen isod am wybodaeth am apwyntiadau Attend Anywhere a chanllawiau ar sut i ddefnyddio'r dull digidol hwn:
Clinigau Rhithwir gydag Attend Anywhere - Bwrdd Iechyd Addysgu Powys
Cyngor ar feini prawf atgyfeirio i weithwyr iechyd proffesiynol a’r cyhoedd
Mae Timau Ffisiotherapi MSK a CMATS yn gweld cleifion â phroblemau cyhyrysgerbydol (problemau sy'n ymwneud â'r cyhyr a'r sgerbwd). Dylai unrhyw un dan 16 oed drafod atgyfeiriadau posibl gyda'u Meddyg Teulu neu Ymarferydd Iechyd arall yn y feddygfa.
Mae enghreifftiau o gyflyrau a welir yn y gwasanaeth yn cynnwys:
- Arthritis neu boen yn y cymalau
- Problemau gyda chyhyrau, gewynnau neu dendonau e.e. penelin tenis neu ysigiadau’r ffêr
- Poen yn yr asgwrn cefn sy'n cynnwys y gwddf, canol y cefn neu waelod y cefn, a phoen sy'n gysylltiedig â'r asgwrn cefn yn eich breichiau neu'ch coesau, gan gynnwys symptomau nerfau, e.e. pinnau bach neu ddideimladrwydd
- Gweld cleifion ar ôl llawdriniaeth orthopedig
Os oes gennych unrhyw un o’r symptomau canlynol, ochr yn ochr â phoen yn y cefn, ewch i Adran Ddamweiniau ac Achosion Brys (A&E) ar unwaith:
- Teimlad gogleisiog / dideimladrwydd (paraesthesia) newydd, sydyn yn yr ardal rhwng eich coesau (ardal y gyfrwy)
- Colled newydd a sydyn wrth reoli eich wrin / ysgarthion
Ehangwch yr adran 'Syndrom Cauda Equina - arwyddion rhybuddio' ganlynol, am ganllawiau pellach ar bryd i geisio cymorth ar unwaith:
Dulliau atgyfeirio
Gallwch hunanatgyfeirio at Wasanaeth Ffisiotherapi MSK drwy'r ddolen ganlynol:
Ffurflen hunanatgyfeirio ar-lein ar gyfer y Gwasanaeth Ffisiotherapi Cyhyrysgerbydol (MSK)
- Bwrdd Iechyd Addysgu Powys
Fel arall, gallwch lawrlwytho un o'r fersiynau dogfennau digidol canlynol o'r ffurflen hunanatgyfeirio. Yna bydd angen i chi lenwi a chyflwyno'r ffurflen wedi'i lawrlwytho gan ddefnyddio'r cyfarwyddiadau a ddarperir yn y ddogfen.
Mae ffurflenni hunanatgyfeirio papur hefyd ar gael o ysbytai lleol a rhai meddygfeydd.
Os oes angen, gellir uwchgyfeirio gofal cleifion yn uniongyrchol o Wasanaeth Ffisiotherapi MSK i CMATS. Ni allwch hunanatgyfeirio'n uniongyrchol i'r Gwasanaeth CMATS.
Derbynnir atgyfeiriadau at MSK Ffisiotherapi a CMATS hefyd trwy feddygon teulu ac ymarferwyr gofal iechyd eraill, fel Ffisiotherapyddion Ymarferydd Cyswllt Cyntaf (YCC).
Mae Ffisiotherapyddion YCC yn Ffisiotherapyddion sydd wedi'u lleoli mewn meddygfeydd teulu, gydag arbenigedd mewn asesu a rheoli cyflyrau MSK. Gall Ffisiotherapydd YCC asesu, cynghori, ymchwilio neu atgyfeirio ymlaen at y gwasanaeth triniaeth mwyaf priodol, heb i'r claf orfod gweld meddyg teulu yn gyntaf.
Mae cleifion ôl-lawdriniaeth hefyd yn aml yn cael eu hatgyfeirio at Wasanaeth Ffisiotherapi MSK ar ôl gweithdrefnau fel ailosod pen-glin neu lawdriniaeth i atgyweirio asgwrn wedi torri.
Beth ddylech chi ei ddisgwyl cyn / yn ystod / ar ôl apwyntiadau?
Unwaith y bydd atgyfeiriad wedi'i wneud i Wasanaeth Ffisiotherapi MSK neu CMATS, cysylltir â chi trwy lythyr neu alwad ffôn, yn eich gwahodd i drefnu apwyntiad. Cynigir dewis i chi rhwng apwyntiad wyneb yn wyneb, dros y ffôn neu rithwir.
Yn ystod eich asesiad cychwynnol, bydd rhywun yn gwrando arnoch chi, ac yn eich annog i ofyn cwestiynau a chyfrannu at benderfyniadau ynghylch eich gofal. Efallai y bydd angen asesiad corfforol, sy'n golygu y dylid gwisgo dillad priodol, er y gofynnir am gydsyniad bob amser cyn cynnal unrhyw asesiad.
Mae amrywiaeth eang o opsiynau rheoli yn y rhan fwyaf o achosion, gyda rhai o'r rhai mwyaf cyffredin yn cynnwys:
- Newidiadau ffordd o fyw yn ymwneud ag ymarfer corff, deiet a gweithgarwch cymdeithasol.
- Addysg ynghylch eich cyflwr a hunanreolaeth.
- Rhaglenni ymarfer corff penodol pan fo'n briodol.
- Therapi ymarferol weithiau.
Ar ôl eich asesiad cychwynnol, bydd cynllun ar gyfer rheolaeth bellach yn cael ei gytuno gyda'ch Ffisiotherapydd. Weithiau dim ond un apwyntiad sydd ei angen. Os cytunir ar fewnbwn parhaus neu reolaidd, mae'r opsiynau'n cynnwys apwyntiadau dilynol wyneb yn wyneb, dros y ffôn neu fideo, a/neu atgyfeiriad at ddosbarthiadau ymarfer corff.
Bydd penderfyniadau ynghylch eich gofal bob amser yn cael eu gwneud gyda'ch mewnbwn a'ch cytundeb chi. Bydd eich meddyg teulu yn cael gwybod am y canlyniad pan gewch eich rhyddhau o'r gwasanaeth.
Adnoddau cyngor a chymorth
Cliciwch ar yr adrannau canlynol i ehangu neu gwympo nhw:
Cysylltu â’r gwasanaeth
Yn dilyn eich atgyfeiriad, byddwn yn cysylltu â chi drwy lythyr neu dros y ffôn, i'ch gwahodd i drefnu apwyntiad gyda Gwasanaeth Ffisiotherapi MSK neu Wasanaeth CMATS.
I drefnu apwyntiadau cychwynnol (ar ôl i chi dderbyn y llythyr neu'r alwad hon) gallwch gysylltu â'r gwasanaeth drwy *:
E-bost: Therapies.Hub.POW@wales.nhs.uk
Neu
Rhif Ffôn: 01686 617267
* Gellir defnyddio'r manylion hyn hefyd ar gyfer ymholiadau ynghylch apwyntiadau dilynol neu gyfathrebiadau sy'n benodol ar gyfer gwasanaeth CMATS.
Cyfeiriad:
Y Ganolfan Therapïau
Clafdy Sirol Maldwyn (Ysbyty’r Drenewydd)
Heol Llanfair
Y Drenewydd
Powys
SY16 2DW
Ar gyfer unrhyw ymholiadau ynghylch apwyntiadau dilynol neu gyfathrebiadau ar gyfer Gwasanaeth Ffisiotherapi MSK gallwch ddefnyddio'r rhifau ffôn canlynol ar gyfer yr Adran Ffisiotherapi briodol:
- Ysbyty Coffa Rhyfel Sir Frycheiniog, Aberhonddu - Adran Ffisiotherapi: 01874 615716
- Ysbyty Bro Ddyfi, Machynlleth - Adran Ffisiotherapi: 01654 705221
- Ysbyty Cymunedol Bronllys - Adran Ffisiotherapi: 01874 712455
- Ysbyty Cymunedol Tref-y-clawdd - Adran Ffisiotherapi 01547 521222
- Ysbyty Coffa Llandrindod - Adran Ffisiotherapi: 01597 828729
- Ysbyty Coffa Rhyfel Llanidloes - Adran Ffisiotherapi: 01686 414205
- Clafdy Sirol Maldwyn (Ysbyty’r Drenewydd), Y Drenewydd - Adran Ffisiotherapi: 01686 617207
- Ysbyty Coffa Victoria, Y Trallwng - Adran Ffisiotherapi: 01938 558930
- Ysbyty Cymunedol Ystradgynlais - Adran Ffisiotherapi: 01639 846442
Cwrdd â’r tîm
Mae Timau Ffisiotherapi MSK a CMATS yn cynnwys y rolau canlynol:
- Pennaeth Proffesiynol Ffisiotherapi: Aled Falvey
- Ffisiotherapydd MSK Ymgynghorol: Carwyn Davies
- Arweinydd Tîm Ffisiotherapyddion MSK
- Gweinyddwyr Therapi
- Gweithwyr Cymorth Ffisiotherapi
- Myfyrwyr Ffisiotherapi
- Ffisiotherapyddion Cylchdro
- Ffisiotherapyddion MSK
- Ffisiotherapyddion Arbenigol Clinigol
Adborth y Claf
Rydym yn croesawu unrhyw adborth a allai fod gennych am eich profiad gyda'r Gwasanaethau Ffisiotherapi MSK neu CMATS ym Mwrdd Iechyd Addysgu Powys (BIAP).
Gallwch gael mynediad at ein harolwg adborth trwy glicio ar y ddolen ganlynol. Fel arall, gallwch sganio'r ddelwedd cod QR cysylltiedig isod gyda ffôn clyfar / dyfais arall os ydych chi am gwblhau'r arolwg trwy ddyfais wahanol. Bydd hyn yn mynd â chi i'r un lleoliad tudalen we â'r ddolen.
Os oes gennym eich rhif ffôn symudol wedi'i gofnodi, anfonir neges destun atoch wythnos ar ôl i chi gael eich rhyddhau o Wasanaeth Ffisiotherapi MSK neu Wasanaeth CMATS. Bydd dolen yn y neges destun a fydd yn mynd â chi i'r arolwg adborth ar-lein.
Bydd canlyniadau'r arolwg yn helpu llunio gwasanaethau Ffisiotherapi, a sicrhau bod y rhai rydyn ni'n eu cefnogi yn derbyn gofal sy'n canolbwyntio ar y claf.
Dolen at arolwg adborth y claf:
Adborth y Claf - Gwasanaethau Ffisiotherapi Cyhyrysgerbydol (MSK) a CMATS Bwrdd Iechyd Addysgu Powys
Delwedd o god QR at arolwg adborth y claf: