Cartref yn Gyntaf

Beth yw gartref yn gyntaf?

Pan fydd eich triniaeth ysbyty wedi dod i ben, gartref yw'r lle gorau i wella. Dyma'r dull gweithredu gartref yn gyntaf.

Mae gartref yn gyntaf yn eich helpu chi i gynnal eich annibyniaeth cymaint â phosibl wrth ichi wella o salwch neu anaf gartref ar ôl arhosiad yn yr ysbyty.

Mae gartref yn gyntaf hefyd yn golygu y caiff asesiadau gofal parhaus eu cynnal gartref, gan mai dyma'r lle gorau i ddeall eich anghenion gofal a chymorth tymor hir.

Gallai "gartref" fod mewn cartref gofal, eich cartref eich hun neu gartref ffrind neu aelod o'r teulu.

Pa risgiau sy'n gysylltiedig ag aros yn yr ysbyty pan fyddwch chi'n ddigon iach i fynd adref?

Gall aros yn yr ysbyty pan fyddwch chi'n ddigon iach i fynd adref arwain at ddatgyflyru. Gall hyn olygu eich bod yn colli'r gallu i wneud tasgau dyddiol. Yn aml, caiff ei achosi gan anweithgarwch a chyfnodau estynedig o amser yn y gwely.

Gall datgyflyru arwain at y canlynol:

lleihau eich annibyniaeth
lleihau eich hyder
lleihau cryfder eich cyhyrau
cynyddu'r risg o iechyd meddwl a llesiant gwael

Gall aros yn yr ysbyty am gyfnod hirach nag sydd ei angen arnoch chi hefyd gynyddu'ch risg o ddal heintiau newydd.

Gallai'r risgiau hyn olygu y bydd angen mwy o ofal a chymorth arnoch chi pan ddaw'r adeg ichi fynd adref. Drwy wella gartref, mae'r risgiau hyn yn cael eu lleihau. Gall bod gartref eich helpu chi i ddychwelyd i'ch trefn arferol, gan eich helpu i gryfhau'n gyflymach.

Sut mae gartref yn gyntaf yn gweithio'n ymarferol?

Cynllunio i ryddhau unigolion

Mae cynllunio ar gyfer eich rhyddhau yn dechrau cyn gynted ag y cewch eich derbyn i'r ysbyty. Y nod yw eich rhyddhau unwaith y bydd eich anghenion meddygol neu ofal yn gallu cael eu diwallu gartref neu yn y gymuned.

Bydd tîm y ward yn gweithio gyda chi ac yn rhoi gwybod ichi pan fyddwch chi'n barod i adael yr ysbyty. Gall tîm y ward gynnwys:

nyrsys
gweithwyr cymdeithasol
therapyddion galwedigaethol
arbenigwyr eraill fel ffisiotherapyddion a deietegwyr
meddygon
swyddogion cyswllt rhyddhau

Bydd eich cynllun rhyddhau yn cynnwys unrhyw gymorth ar unwaith y bydd ei angen arnoch chi i fynd adref. Bydd eich asesiadau gofal neu gymorth tymor hir yn cael eu cynnal gartref, unwaith y byddwch chi wedi cael cyfle i wella ymhellach.

Peidiwch â bod ofn gofyn i staff am y cynllun i'ch rhyddhau. Byddan nhw'n sicrhau bod unrhyw ofal sydd ei angen arnoch chi yn ei le erbyn ichi fynd adref. Nod y cynllun rhyddhau yw eich helpu chi i wella a'ch helpu chi i adael yr ysbyty pan fydd yr amser yn iawn.

Mae hyn yn helpu i leihau'r canlynol:

hyd arosiadau mewn ysbyty
y risg o ddatgyflyru ymhellach neu eiddilwch
y risg o heintiau

Bydd angen i'r cynllun gynnwys yr hyn sy'n bwysig i chi, a bydd hyn yn helpu staff i gynllunio'n dda. Gadewch i dîm y ward wybod a oes unrhyw faterion gartref y mae angen eu datrys fel nad oes oedi cyn eich rhyddhau.

Mae gennych chi, yn ogystal ag aelodau o'ch teulu neu ofalwyr, hawl i gymryd rhan yn y broses gynllunio, fel eich bod yn gwybod:

beth fydd yn digwydd gartref
gyda phwy i gysylltu os oes angen unrhyw gymorth arnoch chi

Opsiynau rhyddhau

Pan fyddwch chi'n barod i fynd adref, caiff rhai opsiynau rhyddhau eu hystyried:

rhyddhau ar unwaith gydag ychydig neu ddim anghenion gofal parhaus
rhyddhau ar unwaith i'ch pecyn gofal arferol (y gofal roeddech chi'n ei dderbyn cyn eich cyfnod yn aros yn yr ysbyty)
rhyddhau gyda chymorth tymor byr i adfer
rhyddhau gydag anghenion gofal hirdymor sefydlog
rhyddhau gydag anghenion gofal hirdymor sefydlog, a fydd yn cynnwys creu cynllun i ddarparu eich gofal a'ch cymorth gartref neu mewn cartref preswyl neu ofal
rhyddhau i leoliad tymor byr gwahanol sef lleoliad 'cam i lawr' neu 'ofal canolradd', i'ch paratoi i fynd adref

Paratoi i fynd adref

Mae llawer o bethau y gallwch chi eu gwneud yn yr ysbyty i ddal ati i symud a pharatoi i fynd adref, gan gynnwys:

gwisgo bob dydd
symud cymaint â phosibl
defnyddio pethau y byddai fel arfer yn eich cartref fel eich sbectol, eich cymorth clyw, eich oriawr a'ch dyddiadur

Yn ystod eich amser yn yr ysbyty, gall eich teulu neu'ch ffrindiau (gofalwyr neu ofalwyr di-dâl) eich helpu chi. Gallan nhw eich helpu chi â thasgau fel bwyta, gwisgo a cherdded, os oes angen. Gall staff yr ysbyty ddangos iddyn nhw sut mae gwneud hyn yn iawn. Bydd hyn yn eich helpu chi a'ch gofalwr i deimlo'n fwy parod pan fyddwch chi'n mynd adref.

Gwybodaeth ddefnyddiol

Gwasanaeth Cysylltwyr Cymunedol GMGP:

01597 828649 / community.connectors@pavo.org.uk

Bydd y Cysylltydd Cymunedol lleol yn bresennol ar yr uned ar ddiwrnodau penodol. Byddan nhw’n gallu:

Gwrando arnoch a deall ‘beth sy’n bwysig’
Eich helpu chi gyrchu gwasanaethau lleol a gwneud synnwyr o’r hyn sydd ar gael
Eich cysylltu chi â grwpiau a gweithgareddau yn eich ardal
Gweithio gyda chi a’ch teulu
Eich cysylltu chi â sawl sefydliad y 3ydd sector gan gynnwys Y Groes Goch Brydeinig: Cymorth Powys yn y Cartref, Age Cymru Powys, Credu (Gofalwyr), Gofal a Thrwsio Powys, Cyngor ar Bopeth Powys, Gwasanaeth Cyfeillio Powys a llawer mwy

Gofynnwch i siarad â’r Cysylltydd Cymunedol pan fyddant yn yr unedau.

Y Tîm Cynghori Ariannol:

Am gymorth, cysylltwch â 01597 826618 neu drwy wrteam@powys.gov.uk

Mae’r Tîm Cynghori Ariannol yn rhoi arweiniad ar gyllidebu, rheoli dyledion, sicrhau’r mwyaf o fudd-daliadau ac opsiynau cymorth ariannol.

Cyngor ar Bopeth Powys:

0345 6018421

Mae Cyngor ar Bopeth Powys ar agor i alwyr o Bowys, ddydd Mawrth, Mercher a dydd Iau rhwng 9yb a 3yp. Os byddwch yn gadael eich manylion a neges fer, byddant yn dychwelyd eich galwad. Ar gyfer gwasanaeth cyfnewid testun defnyddiwch 18001 08082 505720.

Gallwch hefyd ddefnyddio eu ffurflen ar-lein yn www.powyscitizensadvice.org.uk neu fynychu sesiwn allgymorth leol gyda ni.

Maen nhw’n darparu gwybodaeth a chyngor cyfrinachol, diduedd ac annibynnol am ddim ar ystod o faterion, gan gynnwys:

Budd-daliadau
Cyngor ar ddyledion
Cyngor am ynni
Gwaith
Cyngor i ddefnyddwyr a mwy