18-24 Tachwedd yw Wythnos Fyd-eang Ymwybyddiaeth o Ymwrthedd Gwrthficrobaidd (WAAW)
18 Tachwedd 2025
Ymwrthedd i wrthfiotigau yw un o’r bygythiadau mwyaf sy’n ein hwynebu.
Beth yw ymwrthedd i wrthfiotigau?
Defnyddir gwrthfiotigau i drin heintiau a achosir gan facteria ond, bob tro rydyn ni’n eu cymryd, rydyn ni’n rhoi cyfle i’r bacteria ymladd yn ôl. Mae ymwrthedd i wrthfiotigau yn digwydd pan fydd bacteria yn dod o hyd i ffordd o drechu’r cyffuriau sydd wedi’u cynllunio i’w lladd. Mae rhai bacteria bellach yn gallu gwrthsefyll pob gwrthfiotig, ac ni ellir eu lladd o gwbl.
Mae bacteria ymwrthol yn lledaenu’n hawdd o berson i berson, yn enwedig os ydynt mewn cysylltiad agos. Mae hyn yn digwydd yn eich cartref, yn y gymuned ac yn yr Ysbyty. Gall pobl felly 'gario' bacteria sy'n gwrthsefyll hyd yn oed os nad ydyn nhw erioed wedi bod yn sâl neu wedi cymryd gwrthfiotigau.
Os ydym yn rhoi'r gorau i orddefnyddio a chamddefnyddio gwrthfiotigau, gall ymwrthedd arafu, a gall gwrthfiotigau ddechrau gweithio eto.
Helpwch atal ymwrthedd i wrthfiotigau ac amddiffyn eich anwyliaid yn erbyn bacteria niweidiol.
Defnyddir gwrthfiotigau i drin amrywiaeth o heintiau a achosir gan facteria. Nid ydynt yn gweithio ar gyfer heintiau feirysol, gan gynnwys annwyd a ffliw a'r rhan fwyaf o beswch a dolur gwddf.
- Dylech gymryd gwrthfiotigau dim ond pan fydd eich meddyg, fferyllydd, nyrs neu ddeintydd wedi’u presgripsiynu.
- Peidiwch byth â rhannu gwrthfiotigau gyda theulu, ffrindiau nac anifeiliaid anwes.
- Dychwelwch wrthfiotigau sydd heb eu defnyddio i’ch fferyllfa leol bob amser – peidiwch â’u taflu i ffwrdd. Mae hyn yn llygru ein hafonydd, gan fygwth iechyd pobl ac anifeiliaid.
Cofiwch: nid gwrthfiotigau yw’r ateb bob amser. Siaradwch â'ch meddyg, nyrs neu fferyllydd am ragor o wybodaeth.
Am fwy o wybodaeth: icc.gig.cymru/ymwrthedd-gwrthfiotig