Tanya yn Ennill yng Ngwobrau Nyrs y Flwyddyn y Coleg Nyrsio Brenhinol

4 Rhagfyr 2025

Llongyfarchiadau mawr i Tanya Thomas, Arweinydd Tîm ar gyfer Gwasanaethau Iechyd Meddwl Plant a Phobl Ifanc ym Mhowys, a enillodd yng nghategori Nyrs Iechyd Meddwl yng Ngwobrau Nyrs y Flwyddyn Coleg Nyrsio Brenhinol Cymru’r wythnos diwethaf.

Mae gwaith Tanya wrth helpu sefydlu ac arwain Hyb Argyfwng Gwasanaethau Iechyd Meddwl Plant a Phobl Ifanc ym Mhowys wedi gweld gwelliannau sylweddol yng ngofal pobl ifanc sy'n profi argyfyngau iechyd meddwl.

Mae hi wedi dangos sgiliau arweinyddiaeth rhagorol, gan greu gweledigaeth gyffredin i gefnogi pobl ifanc i deimlo eu bod yn cael eu clywed ac i gyrchu at wasanaethau priodol mewn modd amserol.

Mae Tanya wedi bod yn allweddol o'r cychwyn cyntaf, gan recriwtio staff a gweithio ochr yn ochr ag ystadau i sicrhau y byddai'r Hwb newydd yn darparu lleoliad mor groesawgar â phosibl i gynnig asesiadau, cefnogaeth a thriniaeth i bobl ifanc hyd at 18 oed.

Mae'r data hyd yn hyn yn glir, gyda gostyngiad o 25% yn nifer y bobl ifanc ym Mhowys sy'n mynd i'r ysbyty oherwydd pryderon iechyd meddwl, ac adborth rhagorol gan bobl ifanc a'u teuluoedd.

Mae Tanya yn arwain trwy esiampl ac mae hi bob amser wrth law i gynnig cefnogaeth a chyngor. Mae hi'n parhau i weithio gyda phobl ifanc ac nid yw byth yn ofn cymryd rhan i gefnogi'r rhai sydd angen help fwyaf.

Mae Tanya bob amser yn rhoi blaenoriaeth i fudd gorau'r cleifion ac yn mynd yr ail filltir i sicrhau nid yn unig bod eu hanghenion iechyd meddwl yn cael eu diwallu, ond bod pob agwedd ar eu bywydau yn cael eu cefnogi.

Mae pawb yn BIAP yn hynod falch o'r gwaith y mae Tanya a'i chydweithwyr yn ei wneud ac mae'r wobr hon yn haeddiannol iawn.