Ysbyty Aberhonddu yn croesawu Nyrsys Rhyngwladol

12 Tachwedd 2025

Rydym yn falch iawn o fod wedi croesawu ein carfan ddiweddaraf o chwe nyrs sydd wedi'u hyfforddi'n rhyngwladol i Ysbyty Aberhonddu. Mae Sheeja, Reshma, Sibi, Jayalekshmi, Abida ac Ardra i gyd o India ac fe symudon nhw i'r DU yn gynharach eleni. Mae'r chwech wedi ymgartrefu yn Aberhonddu yn hynod o dda ac yn gweithio ar ward Y Bannau yn yr ysbyty.

Nyrsys a Gweithwyr Cymorth Gofal Iechyd yw asgwrn cefn y GIG. Fodd bynnag, nid yw bob amser yn hawdd recriwtio staff nyrsio i ardaloedd gwledig. Felly mae Bwrdd Iechyd Addysgu Powys wedi ehangu ei recriwtio i ddod o hyd i nyrsys hyfforddedig iawn â chymwysterau llawn o dramor.

Dyma ein trydydd grŵp o nyrsys rhyngwladol i ymuno â'r bwrdd iechyd, a'r cyntaf i ymuno yn ne Powys. Wrth sgwrsio â nhw, fe egluron nhw fod rhai pethau ychydig yn wahanol i weithio a byw yn ôl adref ond eu bod nhw'n mwynhau bod yma yn fawr iawn.