Ysbyty Bronllys yn derbyn gwobr y Faner Werdd gan Cadwch Gymru'n Daclus

15 Gorffennaf 2025 

Heddiw, dyfarnwyd statws ‘Y Faner Werdd’ i Ysbyty Bronllys gan Cadwch Gymru’n Daclus mewn seremoni a fynychwyd gan Claire Madsen o Fwrdd Iechyd Addysgu Powys ac Owen Derbyshire, Prif Swyddog Gweithredol Cadwch Gymru’n Daclus, yn ogystal â nifer o aelodau staff sydd wedi bod yn allweddol wrth helpu’r ysbyty i ennill y wobr. 

Bellach yn ei thrydydd degawd, mae Gwobr y Faner Werdd yn cydnabod parciau a mannau gwyrdd sy'n cael eu rheoli'n dda mewn 20 o wledydd ledled y byd. Er bod dros 300 eisoes yng Nghymru, Ysbyty Bronllys fydd yr ysbyty cyntaf i dderbyn y wobr. 

Dywedodd Claire Madsen: “Mae gan Ysbyty Bronllys hanes hir o ddefnyddio ei fannau gwyrdd er budd cleifion a staff. O'n taith gerdded yn y coetir i'n partneriaeth newydd gyda Flora Cultura i alluogi cleifion i gymryd rhan mewn garddio yn ogystal â'n gardd i gyn-filwyr, rydym yn ceisio sicrhau bod cymaint o safle'r ysbyty â phosibl ar gael i staff a chleifion. Rwy'n falch iawn o dderbyn gwobr Baner Werdd Cadwch Gymru'n Daclus ac rydym yn gobeithio parhau â'r bartneriaeth ar gyfer y dyfodol. 

Dywedodd Owen Derbyshire, Prif Weithredwr Cadwch Gymru'n Daclus: 

“Llongyfarchiadau i bawb yn Ysbyty Bronllys ar ennill Gwobr y Faner Werdd – cydnabyddiaeth wych o’ch ymrwymiad i greu a chynnal mannau gwyrdd o ansawdd uchel. 

Ar hyn o bryd, Bronllys yw'r unig safle ysbyty yng Nghymru sydd â Gwobr Baner Werdd lawn, ac mae hynny'n rhywbeth sy'n wirioneddol werth ei ddathlu. Mae'n enghraifft bwerus o sut y gall lleoliadau gofal iechyd ddarparu nid yn unig gofal meddygol ond hefyd mynediad at natur a mannau gwyrdd sy'n cefnogi lles cleifion, staff a'r gymuned ehangach."