Mae Deddf Partneriaeth Gymdeithasol a Chaffael Cyhoeddus (Cymru) 2023 (“Deddf PGChC”) yn cyflawni ymrwymiad y Rhaglen Lywodraethu i roi partneriaeth gymdeithasol ar sail statudol yng Nghymru.
Ar 1 Ebrill 2024 daeth y Ddyletswydd Partneriaeth Gymdeithasol newydd (“y Ddyletswydd”) ar gyrff cyhoeddus i rym yng Nghymru. Mae'r Ddyletswydd wedi'i nodi yn adrannau 15, 16 a 18 o Ddeddf PGChC. Mae'n ategu dyletswyddau lles presennol y mae rhai cyrff cyhoeddus eisoes yn ddarostyngedig iddynt dan Ran 2 o Ddeddf Llesiant Cenedlaethau'r Dyfodol (Cymru) 2015 (“Deddf LlCD”).
Mae Bwrdd Iechyd Addysgu Powys (BIAP) yn croesawu'r dyletswyddau newydd hyn, ac mae'r ddogfen hon yn cynrychioli ein hadroddiad blynyddol cyntaf yn unol ag Adran 18 o'r Ddeddf. Mae'n dangos cynnydd sylweddol o ran cyflawni gair ac ysbryd y Ddeddf, gan adeiladu ar ein sylfeini presennol o bartneriaeth staff, gydag uchelgeisiau clir i gryfhau a datblygu partneriaeth gymdeithasol ymhellach yn y dyfodol.
Rydym yn parhau i fod wedi ymrwymo i gynnal egwyddorion partneriaeth gymdeithasol, gan sicrhau bod ein gweithlu a'n rhanddeiliaid yn chwarae rhan weithredol wrth lunio dyfodol gofal iechyd ym Mhowys. Drwy ymgysylltu’n barhaus, cydweithio a gwneud penderfyniadau ar y cyd, ein nod yw gwella amodau gwaith, gwella ansawdd gwasanaethau a chyflawni canlyniadau iechyd gwell i bobl Cymru.
Rydym yn cymeradwyo ein hadroddiad blynyddol cyntaf i'r Cyngor Partneriaeth Gymdeithasol.
Hayley Thomas, Prif Weithredwr, Bwrdd Iechyd Addysgu Powys.
Adolygwyd a chymeradwywyd gan y Fforwm Partneriaeth Lleol ar 6ed Hydref 2025