Profedigaeth

Os ydych yn ymweld â'r dudalen hon oherwydd rydych chi neu rywun rydych chi'n ei adnabod wedi profi marwolaeth babi, naill ai yn ystod beichiogrwydd neu'n fuan ar ôl genedigaeth, i gychwyn hoffem ddweud pa mor flin rydym am eich colled. Gall colli babi ar unrhyw gyfnod yn ystod beichiogrwydd achosi llawer o emosiynau a theimladau o alar. Does dim ffordd gywir i brosesu galar, ond bwriad y dudalen hon yw tynnu sylw at y cymorth sydd ar gael i chi yn lleol ac yn y gymuned ehangach. 

Fel arfer bydd menywod yn cael cynnig cefnogaeth gan Fydwraig Galar Arbenigol o’r Ysbyty Cyffredinol Dosbarth ac rydym yn cynnig unrhyw gefnogaeth ychwanegol sydd angen ar fenywod a theuluoedd. Ym Mhowys, rydym yn gweithio’n agos gyda Bydwragedd Galar ledled Cymru ac yn anelu at wella’r gefnogaeth a gwasanaethau sy’n cael eu cynnig i deuluoedd sy’n profi galar ym Mhowys.

Ym Mhowys, rydym yn cynnig Fforwm Galar sy’n darparu cefnogaeth ac arweiniad i fenywod a’u teuluoedd sydd wedi profi colled baban. Gallwn gefnogi'r gwaith cynllunio pan fydd teuluoedd yn dymuno dod â'u babanod adref i dreulio peth amser gyda'i gilydd neu gallwn helpu i drefnu cyfnod yn un o'r cyfleusterau hosbis leol. Mae gennym fynediad at “grud cwtsh” sy’n rhoi amser ychwanegol i chi fel teulu i dreulio gyda’ch babi ac rydym yma i gynnig cefnogaeth ac arweiniad ar gyfer anghenion penodol eich teulu chi.

Os ydych wedi darganfod yn anffodus nad oes disgwyl i'ch babi oroesi, gallwn helpu i drefnu i chi gael mynediad at ofal hosbis a gallwn gynnig cyngor a chymorth wrth gynllunio ar gyfer y cyfnod ar ôl genedigaeth