Argymhelliad 4: Diweddariad ar Fodelau Ymateb Gwledig

27 Mawrth 2026

Diweddariad ar y gwaith parhaus i adolygu Argymhelliad 4 – Modelau Ymateb Gwledig yn dilyn trafodaethau diweddar ym Mhwyllgor Comisiynu ar y Cyd GIG Cymru (NWJCC) – Mawrth 2026.

Mae Pwyllgor Comisiynu ar y Cyd GIG Cymru (NWJCC) wedi ystyried diweddariad ar Argymhelliad 4, sy'n canolbwyntio ar wella mynediad at ofal clinigol brys ac argyfwng i bobl sy'n byw mewn ardaloedd gwledig ac anghysbell yng Nghymru.

Deilliodd Argymhelliad 4 o adborth y cyhoedd yn ystod Adolygiad Gwasanaeth y Gwasanaeth Adalw a Throsglwyddo Meddygol Brys (EMRTS) a'i nod yw datblygu cynnig comisiynu ar gyfer gwasanaethau gofal clinigol gwell wedi'u teilwra ar y ffordd mewn cymunedau gwledig ac anghysbell.

Roedd Aelodau’r Cyd-bwyllgor wedi cymeradwyo bwriadau comisiynu sy’n gysylltiedig â’r argymhelliad hwn yn flaenorol, er bod cynnydd ar y gwaith wedi’i ohirio yn ystod yr Adolygiad Barnwrol.

Yn ei gyfarfod diweddaraf, a gynhaliwyd yn gyhoeddus ar 17 Mawrth 2026, nododd y Pwyllgor Comisiynu ar y Cyd fod Argymhelliad 4 yn gwbl ar wahân i benderfyniadau sy'n ymwneud â chyfluniad canolfan ambiwlans awyr, gan adlewyrchu'r safbwynt a gadarnhawyd drwy'r Adolygiad Barnwrol.

Derbyniodd yr aelodau wybodaeth ddiweddaraf hefyd am yr amserlenni disgwyliedig ar gyfer y ganolfan awyr gyfunol, a gadarnhaodd fod ffenestr gynllunio hirach ar gael i ystyried y camau nesaf ar Argymhelliad 4. Mae Elusen Ambiwlans Awyr Cymru yn parhau i ddarparu diweddariadau cyhoeddus rheolaidd ar weithredu eu symudiad o ganolfannau Caernarfon a'r Trallwng i ganolfan gyfunol newydd yng ngogledd Cymru. Gwella Gwasanaeth - Ambiwlans Awyr Cymru

Trafododd y Pwyllgor ddadansoddiad cynnar o ddata perfformiad ambiwlansys a gyhoeddwyd o dan y Fframwaith Perfformiad Ambiwlansys wedi'i ddiweddaru. Ar hyn o bryd, nid yw'r dadansoddiad yn dangos gwahaniaeth clir na chyson ym mherfformiad ambiwlansys rhwng ardaloedd gwledig a threfol, gyda darlun cymysg ledled Cymru.

Felly, yn dilyn trafodaeth am yr opsiynau sydd ar gael, ni chefnogodd y Cyd-bwyllgor yr opsiwn i roi’r gorau i ddatblygu Argymhelliad 4 ac ailddatganodd ei ymrwymiad i fwrw ymlaen â’r argymhelliad. Cytunodd yr aelodau i fwrw ymlaen â gwaith ymgysylltu a datblygu pellach. Bydd hyn yn cynnwys ymgysylltu o’r newydd â chymunedau a rhanddeiliaid ledled cefn gwlad Cymru, parhau i gydweithio â darparwyr – yn benodol Ymddiriedolaeth GIG Prifysgol Gwasanaethau Ambiwlans Cymru – a Byrddau Iechyd, ochr yn ochr â gwaith pellach i ddiffinio’n glir yr anghenion i’w datrys a’r modelau gwasanaeth ambiwlans a allai ddiwallu’r anghenion hynny orau.

Bydd y Cyd-bwyllgor yn parhau i dderbyn y wybodaeth ddiweddaraf am gynnydd drwy ei drefniadau llywodraethu arferol.

Cyhoeddir manylion cyfarfodydd sydd ar ddod a phapurau'r Pwyllgor ar wefan NWJCC: Papurau Cyfarfodydd y Pwyllgor - Pwyllgor Comisiynu ar y Cyd GIG Cymru