Byrddau iechyd yn partneru â gwasanaeth iechyd meddwl ar-lein
Mae gan chwech o’r saith bwrdd iechyd yng Nghymru bellach lwybrau atgyfeirio uniongyrchol at blatfform iechyd meddwl ar-lein SilverCloud wrth i'r gwasanaeth barhau i ehangu.
Mae SilverCloud Cymru yn cynnig cyfres o raglenni hunangymorth dan arweiniad sy'n seiliedig ar Therapi Gwybyddol Ymddygiadol (CBT) i reoli ystod eang o faterion iechyd meddwl.
Yr adran amenedigol ym Mwrdd Iechyd Prifysgol Hywel Dda yw'r tîm diweddaraf i bartneru â'r gwasanaeth.
Mae’r timau eraill sydd wedi ymuno’n ddiweddar yn cynnwys Gwasanaeth Iechyd Plant, Pobl Ifanc a Theuluoedd Bwrdd Iechyd Prifysgol Caerdydd a'r Fro, a'r tîm Seicoleg Plant ym Mwrdd Iechyd Prifysgol Bae Abertawe (BIP BA).
Yn ddiweddar, dechreuodd gwasanaeth seicolegol arloesol Abertawe o fewn Rhwydwaith Clinigol Lymffoedema Cymru atgyfeirio hefyd, ac mae Betsi Cadwaladr – yr unig fwrdd iechyd sy'n weddill i sefydlu llwybr atgyfeirio – yn gweithio tuag at fynediad uniongyrchol eleni.
Dywedodd Fionnuala Clayton, rheolwr prosiect CBT ar-lein GIG Cymru: “Mae hon wedi bod yn ymdrech gydweithredol ac mae'n dyst i frwdfrydedd timau ledled Cymru i ddod â manteision rhaglenni SilverCloud i'w cleifion. Po fwyaf o lwybrau atgyfeirio y gallwn eu sefydlu, y mwyaf o gleifion y gallwn eu cefnogi.”
“Rydym yn gwybod o brofiad bod pobl yn fwy tebygol o gofrestru ar gwrs os ydyn nhw'n cael eu hatgyfeirio at y gwasanaeth trwy feddyg teulu neu ymarferydd iechyd arall.”
"Wrth gwrs, mae croeso i ymarferwyr mewn unrhyw ran o Gymru gyfeirio pobl i'r Gwasanaeth CBT Ar-lein, ond lle mae atgyfeiriad uniongyrchol ar gael, mae'n bwysig ei ddefnyddio dros gyfeirio syml er mwyn hyrwyddo gofal cydweithredol."
Dywedodd Dr Jayne Williams, Seicolegydd Ymgynghorol Cenedlaethol Lymffoedema ar gyfer RhCLC: "Gan fod SilverCloud ar-lein, mae ganddo'r gallu i gyrraedd llawer mwy o bobl nag y gallem ei weld wyneb yn wyneb, ac mae ei hyblygrwydd yn golygu ei fod yn cyd-fynd â bywyd gwaith a theuluol prysur.”
"Mae gallu cynnig rhywbeth y gall cleifion ei wneud yn eu ffordd eu hunain, ar gyflymder sy’n siwtio nhw, yn wych."
Dywedodd Dr Rebecca Saltmarsh, o dîm Seicoleg Plant BIP BA: “Mae SilverCloud wedi cael croeso mawr gan Seicolegwyr Plant ym Mae Abertawe.”
"Rydym yn ymwybodol, i rai pobl ifanc gall cyrchu rhaglen therapiwtig sy'n seiliedig ar dystiolaeth o'u cartref eu hunain, ar yr adeg sydd fwyaf cyfleus iddyn nhw, fod yn hynod fuddiol."
"Mae'r rhaglenni wedi'u seilio'n dda ar theori CBT ond maent yn cael eu cyflwyno mewn ffyrdd diddorol, sy'n addas ar gyfer anghenion datblygiadol pobl ifanc, felly maent yn hygyrch ac yn ymarferol."
Mae data yn dangos bod defnyddwyr y gwasanaeth ddwywaith yn fwy tebygol o gwblhau proses gofrestru SilverCloud pan fyddant yn cael eu cefnogi gan ymarferydd sy'n atgyfeirio.
Roedd nifer y bobl a atgyfeiriodd at y gwasanaeth y llynedd i fyny bron i chwarter ar ffigurau 2023.
Roedd rhaglenni SilverCloud 'Gofod rhag Iselder a Gorbryder', 'Gofod o Orbryder' a 'Gofod rhag Straen' yn parhau i fod y tri chwrs mwyaf poblogaidd ar y platfform y llynedd.
Yn gyffredinol, cynyddodd nifer yr unigolion a gofrestrodd i SilverCloud Cymru 7% yn 2024 o'i gymharu â'r flwyddyn flaenorol.
Mae'n ymddangos y bydd y duedd yn parhau gyda chynnydd o 7.8% a adroddwyd ar gyfer dau fis cyntaf 2025, o'i gymharu â'r un cyfnod y llynedd.
Dywedodd Fionnuala: “Mae Llywodraeth Cymru yn awyddus i annog defnydd o ddatrysiadau ar-lein sy'n cefnogi pobl i ofalu am eu hiechyd a'u lles.
“Rydym yn angerddol am fod yn rhan o'r uchelgeisiau hyn trwy ddarparu mynediad amserol a theg at gymorth iechyd meddwl digidol.”
Mae rhaglenni SilverCloud yn darparu cymorth ar gyfer symptomau ysgafn i gymedrol o iselder, gorbryder, straen, problemau cwsg a mwy.
Gall unrhyw un yng Nghymru sy'n 16 oed neu'n hŷn hunanatgyfeirio at y gwasanaeth, heb weld meddyg teulu ac o gysur eu cartref.
Mae yna hefyd gymorth i bobl ifanc a myfyrwyr ac i rieni a gofalwyr sy'n cefnogi plant gorbryderus.
Am fwy o wybodaeth neu i gofrestru â’r gwasanaeth, ewch i:
https://nhswales.silvercloudhealth.com/signup/
Rhyddhawyd: 21/03/2025