Diweddariad gan Fwrdd Iechyd Addysgu Powys a Chyngor Sir Powys: Cais am Hyb y Drenewydd wedi'i gyflwyno i Lywodraeth Cymru

Mae cais am gyllid i adeiladu hyb iechyd a lles newydd yn y Drenewydd wedi'i gyflwyno i Lywodraeth Cymru gan Fwrdd Iechyd Addysgu Powys a Chyngor Sir Powys.

Mae cyflwyno'r cynllun (a elwir yn Achos Busnes Amlinellol) yn dilyn penderfyniadau gan Gabinet Cyngor Sir Powys a Bwrdd Iechyd Addysgu Powys ar 16 Rhagfyr 2025 i gefnogi'r cais.

Os caiff y cais am gyllid ei gymeradwyo, a bod caniatâd cynllunio yn cael ei roi, yna gallai'r gwaith adeiladu ddechrau mor gynnar â 2027.

Byddai'r hyb newydd arfaethedig, a fydd yn cael ei adeiladu ar safle swyddfeydd Y Parc, yn gweld ystod eang o wasanaethau'n cael eu darparu dan un to mewn amgylchedd modern, pwrpasol. Ochr yn ochr â gwasanaethau iechyd a lles “siop un stop”, mae’r cynlluniau’n cynnwys cyfleusterau hyfforddi newydd i recriwtio a chadw staff iechyd a gofal, gwasanaethau deintyddol cymunedol estynedig, a chlinigau arbenigol newydd ar gyfer pobl â chyflyrau hirdymor sy’n lleihau’r angen i deithio allan o’r sir i Ysbyty Cyffredinol Dosbarth.

Mae'r hyb hefyd yn gam hanfodol tuag at ail gam yn y dyfodol a fyddai'n gweld ysbyty newydd yn y dref gan gynnwys cyfleusterau diagnosteg a thriniaeth estynedig fel bod mwy o ofal a thriniaeth yn cael eu darparu ym Mhowys.

Gallwch gofrestru i gael diweddariadau rheolaidd ar y prosiect gan Raglen Lles Gogledd Powys (partneriaeth rhwng y bwrdd iechyd a'r cyngor sir) drwy gysylltu â powyswellbeing.north@wales.nhs.uk

Ochr yn ochr â chynlluniau ar gyfer cyfleusterau iechyd a lles newydd yn y Drenewydd, mae Rhaglen Lles Gogledd Powys hefyd yn datblygu cynlluniau ehangach i wella iechyd a lles yng Ngogledd Powys. Mae hyn yn cynnwys llety newydd i fyfyrwyr a gweithwyr iechyd a gofal yn y dref, yn ogystal â llety â chymorth.

Mae rhagor o wybodaeth am raglen Lles Gogledd Powys ar gael o wefan Lles Gogledd Powys.

Gwybodaeth Bellach:

Beth sy'n digwydd nesaf?

Mae'r camau nesaf yn cynnwys:

Yn ystod 2026/27: Ystyriaeth gan Lywodraeth Cymru o'r Achos Busnes Amlinellol. Cyflwyno cais cynllunio. Datblygu Achos Busnes Llawn mwy manwl.
Yn ystod 2027/28: Yn amodol ar ganiatâd cynllunio a chymeradwyaeth yr Achos Busnes Llawn, byddai gwaith adeiladu ar y gweill.
Yn ystod 2028/29: Cwblhau hyb iechyd a lles newydd yn y Drenewydd.
Ochr yn ochr â'r gwaith hwn, datblygu'r achos busnes ar gyfer ysbyty cymunedol newydd, yn lle Ysbyty Sir Trefaldwyn y dref, a gwella cyfleusterau diagnosteg a thriniaeth yn y dref.

Beth fydd yr hyb newydd yn cynnwys?

Mae'r hyb newydd yn gam cyntaf hanfodol cyn datblygu achos busnes pellach i gymryd lle Ysbyty Sir Trefaldwyn, ac i ehangu'r ystod o wasanaethau diagnosteg a thriniaeth yng ngogledd Powys, gan leihau'r angen i deithio i Ysbyty Cyffredinol Dosbarth. Bydd yn sicrhau dull mwy cydgysylltiedig o ddarparu gwasanaethau iechyd a lles, ac yn cynyddu'r ystod o wasanaethau a ddarperir yn Y Drenewydd gan gynnwys:

Gwasanaeth deintyddol cymunedol estynedig.
Gwasanaethau gofal sylfaenol lleol gan gynnwys clinigau arbenigol ar gyfer pobl â chyflyrau hirdymor.
Canolfan hyfforddi newydd i helpu mwy o bobl i ddilyn gyrfaoedd mewn iechyd a gofal cymdeithasol yn ogystal â chefnogi staff presennol y bwrdd iechyd a'r cyngor.
Cartref newydd i Ganolfan Integredig i Deuluoedd y Drenewydd gyda iard wedi'i gynllunio'n benodol ar gyfer plant ifanc a'u rhieni.
Cartref newydd i lyfrgell gyhoeddus y dref ynghyd â llyfrgell academaidd newydd i gefnogi'r rhai sy'n astudio yn y ganolfan hyfforddi.
Cartref newydd i dîm gwasanaethau plant y bwrdd iechyd (gan gynnwys staff fel ymwelwyr iechyd)
Cartref newydd i dimau iechyd meddwl y bwrdd iechyd ar gyfer plant, pobl ifanc ac oedolion gan gynnwys gardd synhwyraidd o fewn ail iard.
Ystafelloedd aml-ddefnydd i alluogi amrywiaeth o sesiynau cymorth lles, fel cyngor ariannol neu ioga neu sesiwn canu er lles iechyd, gan gynnwys cyflwyniadau gan grwpiau gwirfoddol a phartneriaid eraill yn y sector cyhoeddus.

Beth yw Achos Busnes Amlinellol?

Pan fyddwn yn datblygu cynlluniau mawr fel Hyb Lles Gogledd Powys, mae angen i ni ddatblygu dogfen o'r enw Achos Busnes. Fel arfer caiff hyn ei baratoi mewn tair cam:

Gelwir y cam cyntaf yn Achos Amlinellol Strategol. Mae hyn yn nodi'r uchelgais gyffredinol.
Yr ail gam yw'r Achos Busnes Amlinellol. Mae hyn yn cynnwys datblygu a gwerthuso opsiynau yn fanylach.
Y trydydd cam yw'r Achos Busnes Llawn. Dyma'r ddogfen dechnegol derfynol sy'n nodi cynllun manwl iawn ar gyfer cyflawni'r cynllun.

Ar gyfer yr hyb iechyd a lles newydd, rydym wedi cyfuno'r Achos Amlinellol Strategol a'r Achos Busnes Amlinellol yn un ddogfen, a gymeradwywyd gan Fwrdd Iechyd Addysgu Powys a Chabinet Cyngor Sir Powys ar 16 Rhagfyr 2025.

Mae'r ddogfen hon wedi'i chyflwyno i Lywodraeth Cymru. Byddant yn gwneud penderfyniad ynghylch a ddylid cefnogi'r Achos Busnes Amlinellol gan gynnwys dyrannu cyllid cyfalaf i'r cynllun. Yna bydd angen i ni ddatblygu a chwblhau'r Achos Busnes Llawn fel cam olaf cyn y gallai'r gwaith adeiladu ddechrau.

Sut alla i ddysgu mwy a chymryd rhan?

Mae rhagor o wybodaeth am raglen Lles Gogledd Powys ar gael o wefan Lles Gogledd Powys.

Cofrestrwch am ddiweddariadau rheolaidd ar raglen Lles Gogledd Powys drwy gysylltu â powyswellbeing.north@wales.nhs.uk