Ffocws Cymunedol Tref-y-clawdd a Dwyrain Sir Faesyfed - Rhifyn 4

Mae’r bwletin hwn yn rhoi’r wybodaeth ddiweddaraf i chi ar ddatblygiadau i wasanaethau’r GIG yn Nhref-y-clawdd a Dwyrain Sir Faesyfed, gan gynnwys Ysbyty Cymunedol Tref-y-clawdd.

Mewn rhifynnau diweddar o'r cylchlythyr hwn rydym wedi siarad am ein her i recriwtio staff nyrsio cleifion mewnol i Ysbyty Tref-y-clawdd a'n penderfyniad i gyflwyno pedair ystafell 'ailalluogi' dros dro yn Ward Panpwnton yr ysbyty.

Rydym yn falch iawn o ddweud bod yr ystafelloedd hynny bellach ar waith ac yn cael eu defnyddio gan gleifion ailalluogi o'r ardal, hynny yw, y rhai nad oes angen gofal Ysbyty Cyffredinol Dosbarth arnynt fwyach ond sydd angen cymorth o hyd cyn dychwelyd adref. Mae’r gwelyau hyn yn cael eu rheoli gan ein tîm gofal preswyl profiadol ac, lle bo angen, yn cael eu cefnogi gan gydweithwyr clinigol gan gynnwys nyrsys a gweithwyr iechyd proffesiynol cysylltiedig.

Er bod pedair ystafell, mae gan un o'r rhain ddau wely ynddo, er mwyn caniatáu i aelod o'r teulu/gofalwr aros gyda'r claf. Gyda'r cynllun hwn, bydd mwy o bobl yn cael mwy o ofal yn eu cymuned leol, gan leihau'r angen i deulu, ffrindiau a gofalwyr deithio i ysbytai cyffredinol dosbarth neu ysbytai cymunedol eraill.

Noddodd David Farnsworth, Cyfarwyddwr Cynorthwyol Gwasanaethau Cymunedol Bwrdd Iechyd Addysgu Powys: "Dros y misoedd diwethaf, rydym wedi ailaddurno'r lle i'w wneud yn addas ar gyfer y gwelyau ailalluogi ac wedi gweithio'n agos gydag Arolygiaeth Gofal Cymru i sicrhau bod yr ystafelloedd yn addas i'r diben. Rydym hefyd wedi cysylltu â thîm Gofal Cymdeithasol Cyngor Sir Powys fel eu bod yn ymwybodol o'r hyn rydym yn ei wneud yn y maes hwn."

"Mae'n ddyddiau cynnar ond rydyn ni wrth ein bodd gyda sut mae'r trefniant dros dro yma'n gweithio."

Dros y tair blynedd ddiwethaf mae’r bwrdd iechyd wedi bod yn gweithio'n galed i recriwtio nyrsys cofrestredig i ymuno â'r tîm cleifion mewnol yn Ysbyty Tref-y-clawdd. Ond yn anffodus, er ein bod wedi derbyn ychydig o ddiddordeb mewn rolau nyrsio cofrestredig, nid yw wedi cyrraedd y lefelau sydd eu hangen eto i redeg ward 24 awr y dydd, saith diwrnod yr wythnos. Fel y bydd pobl wedi gweld ar y newyddion, mae recriwtio staff nyrsio yn her ledled y DU ac mae cydweithwyr yn Sir Amwythig yn cael problemau tebyg yn Bishop's Castle.

Ychwanegodd Mr Farnsworth: "Mae'n rhaid i mi bwysleisio ein bod wedi ymrwymo'n llwyr i ddatblygiad parhaus gwasanaethau i bobl yn Nhref-y-clawdd a Dwyrain Sir Faesyfed, a byddwn yn parhau i weithio gyda chi i sicrhau dyfodol disglair i Ysbyty Tref-y-clawdd.”