Gwella gyda'n Gilydd: Diweddariad yn dilyn cyfarfod y Bwrdd ar 29 Gorffennaf 2026

Fy myfyrdodau ar drafodaeth Gwella Gyda'n Gilydd y Bwrdd heddiw: Deb Wood-Lawson, Cyfarwyddwr Gweithredol Pobl, Diwylliant a Thrawsnewid

Roedd cyfarfod y Bwrdd yr wythnos hon yn cynnwys trafodaeth bwysig am Gwella Gyda'n Gilydd, ein rhaglen i weithio gyda chymunedau, staff a phartneriaid i lunio dyfodol gwasanaethau cymunedol iechyd corfforol a meddyliol oedolion ym Mhowys. Derbyniodd aelodau'r Bwrdd ddiweddariad sicrwydd ar y gwaith sydd wedi digwydd hyd yn hyn a chymeradwyon nhw'r cynllun ymgynghori a fyddai'n cael ei ddefnyddio pe bai'r Bwrdd yn penderfynu ym mis Medi bod y cynigion yn barod ar gyfer ymgynghoriad ffurfiol. Yn bwysig, nid oes unrhyw benderfyniadau wedi'u gwneud ynghylch siâp gwasanaethau yn y dyfodol.

Rwy'n gwybod bod sgyrsiau am ddyfodol gwasanaethau iechyd o bwys mawr i bobl ledled Powys. Maen nhw'n bwysig oherwydd eu bod nhw'n ymwneud â'r gofal iechyd rydyn ni i gyd yn dibynnu arno, y lleoedd sy'n bwysig i'n cymunedau, a'r staff sy'n gweithio bob dydd i gefnogi cleifion a theuluoedd.

Canolbwyntiodd y drafodaeth ar pam mae angen newid, y gwaith tystiolaeth ac ymgysylltu sydd wedi digwydd hyd yn hyn, a'r camau sy'n cael eu cymryd tuag at gyflwyno Achos Busnes Cyn-Ymgynghori i'r Bwrdd ym mis Medi. Clywodd aelodau'r bwrdd sut mae ymgysylltu â chymunedau, staff, partneriaid a rhanddeiliaid wedi helpu llunio'r gwaith sy'n dod i'r amlwg, ochr yn ochr â chyngor clinigol, modelu, profi llwybrau a sicrwydd annibynnol.

Nid adolygiad o wasanaethau presennol yn unig yw Gwella Gyda'n Gilydd. Mae'n ymwneud â chynllunio ar gyfer anghenion y dyfodol a sicrhau bod gwasanaethau iechyd a gofal yn parhau i fod yn gynaliadwy ar gyfer cenedlaethau'r dyfodol. Un o'r pwyntiau pwysicaf i'w bwysleisio yw nad oes unrhyw benderfyniadau wedi'u gwneud ynghylch siâp gwasanaethau yn y dyfodol. Os bydd y Bwrdd yn cytuno ar 16 Medi bod y cynigion yn barod i ymgynghori arnynt, yna bydd cyfle i bobl ledled Powys edrych arnynt, gofyn cwestiynau heriol a rhannu eu barn cyn gwneud unrhyw benderfyniadau terfynol.

Trafododd aelodau'r bwrdd hefyd yr hyn y mae pobl wedi'i ddweud wrthym yn ystod ymgysylltiadau blaenorol. Er bod cysylltiad cryf â gwasanaethau lleol, mae cymunedau hefyd wedi bod yn glir ynghylch yr angen i wasanaethau fod yn ddiogel, yn effeithiol, yn gynaliadwy ac wedi'u cynllunio o amgylch yr hyn sydd bwysicaf i bobl leol. Maent wedi tynnu sylw at bwysigrwydd gwasanaethau cymunedol cryfach, atal, integreiddio a mynediad teg, gan gydnabod yr heriau penodol o ddarparu gwasanaethau ar draws sir wledig fawr fel Powys.

Os bydd y Bwrdd yn cytuno ym mis Medi bod y cynigion yn barod i ymgynghori arnynt, bydd cyfleoedd i gymryd rhan drwy gydol yr Hydref, ledled y sir. Ar ôl hynny, bydd eich holl adborth yn cael ei ystyried yn ofalus a bydd yn llywio ac yn dylanwadu'n uniongyrchol ar argymhellion a phenderfyniadau yng ngwanwyn 2027.

Mae'r cynllun ymgynghori a gymeradwywyd yr wythnos hon – ac rwy'n pwysleisio mai dyma'r cynllun ar gyfer sut y byddai'r ymgynghoriad yn digwydd, ac nid penderfyniadau eto ar yr opsiynau a fydd yn cael eu cyflwyno ar gyfer ymgynghori – yn cynnwys amrywiaeth o ffyrdd i bobl gymryd rhan, gan gynnwys digwyddiadau galw heibio cyhoeddus ym mhob un o 13 ardal Powys, gweithgaredd allgymorth gyda grwpiau cymunedol, grwpiau ffocws a hwylusir yn annibynnol, deunyddiau ymgynghori hygyrch a dadansoddiad annibynnol o'r adborth a dderbyniwyd. Bydd rhagor o wybodaeth ar gael ym mis Medi unwaith y bydd y manylion wedi'u cadarnhau.

Rydym yn cydnabod y gall sgyrsiau am ddyfodol gwasanaethau greu ansicrwydd a phryder. Dyna pam ei bod hi’n bwysig ein bod ni’n parhau i fod yn agored ynglŷn â’r gwaith sy’n digwydd, yn glir ynglŷn â pha gam rydyn ni wedi’i gyrraedd, ac wedi ymrwymo i wrando’n ofalus ar yr hyn mae pobl yn ei ddweud wrthym ni.

Byddwn yn annog pawb sydd â diddordeb yn Gwella Gyda’n Gilydd i ddilyn y rhaglen dros yr wythnosau a'r misoedd nesaf, gwylio trafodaeth y Bwrdd a chofrestru i gael y wybodaeth ddiweddaraf yn rheolaidd.

Y garreg filltir allweddol nesaf fydd cyfarfod y Bwrdd ar 16 Medi, pan fydd aelodau’n ystyried yr Achos Busnes Cyn Ymgynghori ac yn penderfynu a ddylai cynigion fynd ymlaen i ymgynghoriad ffurfiol. Os bydd hynny'n digwydd, bydd cyfleoedd i bobl ledled Powys ddweud eu dweud cyn gwneud unrhyw benderfyniadau terfynol. Byddwn yn sicrhau bod gwybodaeth am yr ymgynghoriad hwn yn cael ei rhannu'n eang ledled y sir.

Rwy’n mawr obeithio bod y darn fideo a gyhoeddwyd gyda'r erthygl hon yn ddefnyddiol. Mae'n rhoi cyfle i bobl wylio'r drafodaeth o gyfarfod y Bwrdd yr wythnos hon, clywed y diweddariad yn uniongyrchol, a deall y camau nesaf ar gyfer Gwella Gyda'n Gilydd.

Mae copi o'r adroddiad sicrwydd a'r cynllun ymgynghori drafft a ystyriwyd gan y Bwrdd ar gael o'n tudalen Dogfennau Technegol Gwella Gyda'n Gilydd.