Helpu eich plentyn archwilio a deall ei emosiynau
Mae Wythnos Iechyd Meddwl Plant yn ymwneud â helpu pobl ifanc i deimlo'n gryf ac wedi’u cefnogi yn eu lles meddyliol.
Mae'r thema eleni - 'Adnabod dy Hun, Tyfu dy Hun' - yn annog pobl ifanc i ddeall a mynegi eu teimladau, ac yn tynnu sylw at bwysigrwydd hunanymwybyddiaeth ar gyfer twf emosiynol a gwydnwch parhaol.
Nid yw bob amser yn hawdd siarad am sut rydyn ni'n teimlo. Rhowch gynnig ar y pum awgrym hwn i helpu arwain eich plentyn i archwilio ei emosiynau.
Defnyddio sefyllfaoedd bob dydd ar gyfer dysgu emosiynol
Bydd cysylltu emosiynau â sefyllfaoedd bywyd bob dydd yn helpu'ch plentyn i ddatblygu ei eirfa emosiynol a'i sgiliau datrys problemau. Er enghraifft, os ydynt yn teimlo’n rhwystredig oherwydd gwaith cartref, siaradwch am sut mae hynny'n teimlo ac yn cychwyn sgwrs am ffyrdd o'i reoli.
Defnyddio straeon a chwarae
Gall llyfrau, straeon a gemau chwarae rôl helpu plant archwilio emosiynau mewn ffordd sy'n ddiogel ac sy’n hawdd uniaethu ag ef. Dewiswch straeon gyda heriau a phenderfyniadau emosiynol, trafod sut roedd y cymeriadau'n teimlo a gofynnwch i'ch plentyn beth fyddai'n ei wneud mewn sefyllfa debyg.
Bod yn fodel rôl ar gyfer ymwybyddiaeth emosiynol
Mae plant yn dysgu trwy arsylwi felly rhannwch eich teimladau eich hun mewn ffordd sy'n briodol i'w hoedran. Er enghraifft, gallech drafod sut rydych chi'n teimlo'n nerfus cyn cyfarfod gwaith pwysig, yna dangoswch i'ch plentyn sut mae cymryd anadliadau dwfn yn eich helpu adfer eich tawelwch mewnol.
Dysgu strategaethau ymdopi
Yn ogystal ag anadlu'n ddwfn, cyflwynwch eich plentyn i dechnegau syml eraill fel defnyddio dyddiadur, darlunio ystyriol neu fyfyrdod. Ymarferwch nhw gyda'ch gilydd i ddangos i'ch plentyn bod ei emosiynau’n ddilys ac nad yw ar ei ben ei hun.
Ymarfer enwi emosiynau
Weithiau gall emosiynau deimlo'n llethol, ond bydd rhoi enw iddynt yn helpu'ch plentyn i'w rheoli. Ceisiwch ddefnyddio offer fel cardiau fflach, emojis neu olwyn emosiwn. Cadwch at eiriau syml fel 'dig', 'dryslyd' neu 'hapus'.
Am fwy o help i gefnogi plentyn neu berson ifanc sy'n delio â gorbryder, edrychwch ar gyrsiau ar-lein rhad ac am ddim SilverCloud.
Nid oes angen i chi weld meddyg teulu, cadw at apwyntiadau neu ymweld â chlinigau. Gweithiwch trwyddynt gyda'ch plentyn yng nghysur eich cartref eich hun ar amser a chyflymder sy'n siwtio eich ffordd o fyw.
Darganfyddwch fwy neu cofrestrwch heddiw a lawrlwytho'r ap: SilverCloud. Making Space For Healthy Minds
Cyhoeddwyd: 3/02/2025