Lansio gwasanaeth i helpu plant, pobl ifanc a theuluoedd i gael mynediad at gymorth lles emosiynol

7 Medi 2026

Mae gwasanaeth newydd sydd wedi'i gynllunio i'w gwneud hi'n haws i blant, pobl ifanc a theuluoedd Powys gael mynediad at gymorth lles emosiynol wedi'i lansio'n swyddogol.

Lansiwyd SPACE Powys (Pwynt Mynediad Sengl ar gyfer Lles Emosiynol Plant) ddydd Iau (3 Medi) ac mae'n darparu un llwybr cydgysylltiedig at gyngor, gwybodaeth, cymorth cynnar a chymorth lles emosiynol i fabanod, plant a phobl ifanc rhwng 0 a 25 oed a'u teuluoedd.

Mae'r gwasanaeth yn gweithredu fel drws ffrynt rhithwir aml-asiantaeth, gan ddod â phartneriaid ynghyd o bob rhan o wasanaethau addysg, iechyd, gofal cymdeithasol a chymorth i sicrhau bod teuluoedd yn derbyn y gefnogaeth gywir, ar yr adeg iawn, heb orfod llywio llwybrau atgyfeirio lluosog.

Trwy un pwynt cyswllt, gall teuluoedd, pobl ifanc a gweithwyr proffesiynol gael mynediad at gyngor, arweiniad a chefnogaeth. Yn dilyn atgyfeiriad neu ymholiad, bydd tîm SPACE yn cynnal sgwrs 'Beth Sy’n Bwysig’ i ddeall anghenion, cryfderau ac amgylchiadau unigol yn well cyn cysylltu pobl â'r cymorth mwyaf priodol.

Nod SPACE Powys yw darparu:

·       Mynediad cynnar at gyngor, gwybodaeth ac arweiniad

·       Cysylltiadau cyflymach â gwasanaethau a chymorth priodol

·       Profiad mwy cydgysylltiedig i deuluoedd

·       Gwneud penderfyniadau cyson trwy ddull aml-asiantaeth

·       Llai o ddyblygu a llwybrau cymorth cliriach i weithwyr proffesiynol

Mae'r gwasanaeth ar gael drwy:

·       Ffurflenni atgyfeirio ar-lein: Cymorth Iechyd a Lles Emosiynol i'ch teulu - Cyngor Sir Powys

·       Gwefan ar gyfer y cyhoedd: Sut i gael cymorth iechyd emosiynol a lles i'ch plentyn neu'ch teulu | SPACE Powys - Cyngor Sir Powys

·       Rhif ffôn pwrpasol: 01873 377758

Mae hunan-atgyfeiriadau gan deuluoedd a phobl ifanc, ac atgyfeiriadau gan weithwyr proffesiynol, yn bwydo i'r un system gydlynu.

Mae datblygiad SPACE wedi'i lywio gan waith ledled Powys a nododd yr angen am ddull symlach a mwy cydgysylltiedig o gymorth iechyd a lles emosiynol. Mae'r gwasanaeth yn adeiladu ar egwyddorion fframwaith Nyth/Nest a'i nod yw sicrhau bod plant a phobl ifanc yn derbyn cymorth cyn i broblemau waethygu.

Dywedodd y Cynghorydd Sandra Davies, Aelod Cabinet Cyngor Sir Powys ar gyfer Cenedlaethau'r Dyfodol: "Mae lansio SPACE Powys yn gam sylweddol ymlaen yn y ffordd yr ydym yn cefnogi iechyd a lles emosiynol plant, pobl ifanc a theuluoedd ledled ein sir.

"Rydyn ni'n gwybod bod llywio gwasanaethau weithiau yn gallu bod yn ddryslyd a bod teuluoedd yn aml eisiau help yn gynharach. Mae SPACE yn darparu llwybr sengl, hawdd ei gyrchu sy'n dod â sefydliadau at ei gilydd, yn lleihau dyblygu ac yn helpu pobl i gael y gefnogaeth gywir y tro cyntaf.

"Trwy weithio mewn partneriaeth a chanolbwyntio ar ymyrraeth gynnar, gallwn wneud gwahaniaeth gwirioneddol i fywydau plant a phobl ifanc, gan eu helpu i adeiladu gwytnwch, gwella lles a chael mynediad at gymorth cyn i anawsterau ddod yn fwy difrifol.

"Hoffwn ddiolch i'r holl bartneriaid a staff sydd wedi gweithio'n galed i ddatblygu'r gwasanaeth arloesol hwn a'i wneud ar gael i deuluoedd ledled Powys."

Mae llwybrau i wasanaethau presennol yn parhau ac nid yw SPACE yn disodli llwybrau i wasanaethau brys neu argyfwng, gweithdrefnau diogelu na llwybrau atgyfeirio CAMHS. Os oes angen cymorth brys arnoch, ffoniwch GIG 111, opsiwn 2, neu 999 mewn argyfwng.

Gall teuluoedd, pobl ifanc a gweithwyr proffesiynol gael gwybod mwy a chael mynediad i'r gwasanaeth drwy wefan SPACE Powys: Sut i gael cymorth iechyd emosiynol a lles i'ch plentyn neu'ch teulu | SPACE Powys - Cyngor Sir Powys

Mae SPACE Powys wedi'i ddatblygu gyda chymorth buddsoddiad Cronfa Integreiddio Ranbarthol Llywodraeth Cymru, gyda chefnogaeth Bwrdd Partneriaeth Rhanbarthol Powys a Bwrdd Dechrau'n Dda.

PENNAWD Y LLUN: Y tîm amlasiantaeth y tu ôl i ddatblygiad SPACE Powys.