Penderfyniadau allweddol ar hyb iechyd a lles newydd yn y Drenewydd i'w gwneud yn y dyddiau nesaf

Mae cynigion ar gyfer hyb iechyd a lles newydd yn y Drenewydd yn dechrau cam allweddol, gyda'r cynlluniau presennol (“Achos Busnes Amlinellol”) i'w hystyried gan Bwyllgor Craffu Iechyd a Gofal Cyngor Sir Powys cyn mynd gerbron Cabinet Cyngor Sir Powys a Bwrdd Iechyd Addysgu Powys i'w hystyried ar 16 Rhagfyr 2025.

Byddai'r hyb newydd arfaethedig, a fydd yn cael ei adeiladu ar safle swyddfeydd Y Parc, yn gweld ystod eang o wasanaethau'n cael eu darparu dan un to mewn amgylchedd modern, pwrpasol. Ochr yn ochr â gwasanaethau iechyd a lles “siop un stop”, mae’r cynlluniau’n cynnwys cyfleusterau hyfforddi newydd i recriwtio a chadw staff iechyd a gofal, gwasanaethau deintyddol cymunedol estynedig, a chlinigau arbenigol newydd ar gyfer pobl â chyflyrau hirdymor sy’n lleihau’r angen i deithio allan o’r sir i Ysbyty Cyffredinol Dosbarth.

Mae'r hyb hefyd yn gam hanfodol tuag at ail gam yn y dyfodol a fyddai'n gweld ysbyty newydd yn y dref gan gynnwys cyfleusterau diagnosteg a thriniaeth estynedig fel bod mwy o ofal a thriniaeth yn cael eu darparu ym Mhowys.

Yn ystod yr wythnosau diwethaf, cynhaliwyd cyfres o ddigwyddiadau ymgysylltu i gasglu adborth gan drigolion, defnyddwyr gwasanaeth, staff a sefydliadau partner. Dywedodd y Cynghorydd Pete Roberts, Aelod Cabinet y cyngor sydd â chyfrifoldeb am raglen Lles Gogledd Powys: “Mae hwn wedi bod yn gyfle gwerthfawr i glywed ystod eang o safbwyntiau gan bobl a fydd yn defnyddio’r gwasanaethau newydd hyn, a gan drigolion lleol. Er enghraifft, rydym wedi clywed ystod eang o adborth defnyddiol am leoliad y cyfleuster newydd. Mae'r adborth hwn wedi ein helpu ni adolygu a phrofi'r cynigion fel ein bod yn gwneud y penderfyniadau gorau ar gyfer heddiw ac ar gyfer cenedlaethau'r dyfodol.”

Dywedodd Lucie Cornish, Cyfarwyddwr Gwella a Thrawsnewid y bwrdd iechyd: “Thema allweddol rydyn ni wedi’i chlywed yn ystod ein hymgysylltiad yw bod pobl eisiau i wasanaethau iechyd a lles fod yn fwy cydgysylltiedig. Byddai'r cynlluniau hyn yn cyflawni hyn drwy ddod â mwy o wasanaethau'r bwrdd iechyd a'r cyngor at ei gilydd o dan un to. Bydd hyn yn gwella'r gwasanaethau a gynigir i'n preswylwyr a'n cleifion drwy berthnasoedd gwaith agosach mewn adeilad pwrpasol, fel rhan o'r prosiect mwyaf uchelgeisiol o'i fath yr ydym wedi'i weld ym Mhowys.”

Bydd cyfarfodydd nesaf y Pwyllgor Craffu, y Cabinet a'r Bwrdd yn ystyried cynigion wedi'u diweddaru ar gyfer yr hyb iechyd a lles newydd sydd wedi'u llywio gan adborth ymgysylltu. Mae'r cynlluniau hyn – a elwir yn Achos Busnes Amlinellol – yn gam allweddol wrth ofyn am gyllid cyfalaf ar gyfer prosiectau mawr.

Ochr yn ochr â chynlluniau ar gyfer cyfleusterau iechyd a lles newydd yn y Drenewydd, mae Rhaglen Lles Gogledd Powys hefyd yn datblygu cynlluniau ehangach i wella iechyd a lles yng Ngogledd Powys. Mae hyn yn cynnwys llety newydd i fyfyrwyr a gweithwyr iechyd a gofal yn y dref, yn ogystal â llety â chymorth.

Gwybodaeth Bellach:

Os caiff ei gymeradwyo gan y Cabinet a'r Bwrdd Iechyd, byddai'r camau nesaf yn cynnwys:

Erbyn diwedd mis Rhagfyr: Cyflwyno Achos Busnes Amlinellol i Lywodraeth Cymru
Yn ystod 2026/27: Ystyriaeth gan Lywodraeth Cymru o'r Achos Busnes Amlinellol. Cyflwyno cais cynllunio. Datblygu Achos Busnes Llawn mwy manwl.
Yn ystod 2027/28: Yn amodol ar ganiatâd cynllunio a chymeradwyaeth yr Achos Busnes Llawn, byddai gwaith adeiladu ar y gweill.
Yn ystod 2028/29: Cwblhau hyb iechyd a lles newydd yn y Drenewydd.
Ochr yn ochr â'r gwaith hwn, datblygu'r achos busnes ar gyfer ysbyty cymunedol newydd, yn lle Ysbyty Sir Trefaldwyn y dref, a gwella cyfleusterau diagnosteg a thriniaeth yn y dref.

Mae'r hyb newydd yn gam cyntaf hanfodol cyn datblygu achos busnes pellach i gymryd lle Ysbyty Sir Trefaldwyn, ac i ehangu'r ystod o wasanaethau diagnosteg a thriniaeth yng ngogledd Powys, gan leihau'r angen i deithio i Ysbyty Cyffredinol Dosbarth. Bydd yn sicrhau dull mwy cydgysylltiedig o ddarparu gwasanaethau iechyd a lles, ac yn cynyddu'r ystod o wasanaethau a ddarperir yn Y Drenewydd gan gynnwys:

Gwasanaeth deintyddol cymunedol estynedig.
Gwasanaethau gofal sylfaenol lleol gan gynnwys clinigau arbenigol ar gyfer pobl â chyflyrau hirdymor.
Canolfan hyfforddi newydd i helpu mwy o bobl i ddilyn gyrfaoedd mewn iechyd a gofal cymdeithasol yn ogystal â chefnogi staff presennol y bwrdd iechyd a'r cyngor.
Cartref newydd i Ganolfan Integredig i Deuluoedd y Drenewydd gyda iard wedi'i gynllunio'n benodol ar gyfer plant ifanc a'u rhieni.
Cartref newydd i lyfrgell gyhoeddus y dref ynghyd â llyfrgell academaidd newydd i gefnogi'r rhai sy'n astudio yn y ganolfan hyfforddi.
Cartref newydd i dîm gwasanaethau plant y bwrdd iechyd (gan gynnwys staff fel ymwelwyr iechyd)
Cartref newydd i dimau iechyd meddwl y bwrdd iechyd ar gyfer plant, pobl ifanc ac oedolion gan gynnwys gardd synhwyraidd o fewn ail iard.
Ystafelloedd aml-ddefnydd i alluogi amrywiaeth o sesiynau cymorth lles, fel cyngor ariannol neu ioga neu sesiwn canu er lles iechyd, gan gynnwys cyflwyniadau gan grwpiau gwirfoddol a phartneriaid eraill yn y sector cyhoeddus.

Mae rhagor o wybodaeth am raglen Lles Gogledd Powys ar gael yn https://www.dweudeichdweudpowys.cymru/hub-page/lles-gogledd-powys

Cofrestrwch am ddiweddariadau rheolaidd ar raglen Lles Gogledd Powys drwy gysylltu â powyswellbeing.north@wales.nhs.uk