Pwysau ariannol ar y GIG yn sbarduno newid mewn statws uwchgyfeirio BIAP

Mae'r statws uwchgyfeirio cenedlaethol ar gyfer BIAP wedi'i gynyddu o "fonitro uwch" (lefel 3) i "ymyrraeth wedi'i thargedu" (lefel 4) ar gyfer cyllid, strategaeth a chynllunio.

Efallai y byddwch yn ymwybodol bod gan Lywodraeth Cymru Drefniadau Uwchgyfeirio ac Ymyrryd ar y Cyd. Drwy'r trefniadau hyn maent yn cyfarfod o leiaf ddwywaith y flwyddyn gydag Archwilio Cymru ac Arolygiaeth Gofal Iechyd Cymru i drafod materion a phryderon am bob Bwrdd Iechyd, Ymddiriedolaeth ac Awdurdod Iechyd Arbennig.

Fel rhan o'r Trefniadau Uwchgyfeirio ac Ymyrryd ar y Cyd. Mae Byrddau Iechyd, Ymddiriedolaethau ac Awdurdodau Iechyd Arbennig yng Nghymru yn cael statws ymyrraeth ac uwchgyfeirio mewn pum band:

• Trefniadau Arferol (lefel 1)
• Maes Pryder (lefel 2)
• Monitro Uwch (lefel 3)
• Ymyrraeth Wedi'i Thargedu (lefel 4)
• Mesurau Arbennig (lefel 5)

Mae'r GIG ar draws y wlad yn wynebu cyd-destun heriol iawn o ran cyllid a chynllunio, ac mae hyn yn cael ei adlewyrchu'n fawr iawn yn ein sefyllfa yma ym Mhowys:

• 2022/23 oedd y tro cyntaf ers 2015 ni lwyddodd BIAP sicrhau sefyllfa mantoli ariannol, gan ddod â'r flwyddyn i ben gyda diffygion o £7m.
• Ar gyfer 2024/25, bydd y cynllun yr ydym wedi'i gyflwyno i Lywodraeth Cymru yn dod â'r flwyddyn sydd i ddod i ben gyda sefyllfa diffygion o £23m.
• Ein cyllideb gyffredinol yw tua £400m y flwyddyn. Mae hyn yn golygu ein bod yn gwario ychydig dros £1m bob dydd, ond mae ein sefyllfa diffygion yn golygu ein bod yn gwario £90,000 bob dydd na allwn ei fforddio.

O ystyried hyn, roeddem yn disgwyl yn fawr y byddai Bwrdd Iechyd Addysgu Powys yn cael ei uwchgyfeirio o "fonitro uwch" i "ymyrraeth wedi'i thargedu" ar gyfer cyllid, strategaeth a chynllunio. Bydd hyn yn golygu mwy o graffu a chefnogaeth gan Lywodraeth Cymru. Mae hefyd yn golygu y byddwn ni fel Bwrdd yn parhau i gadw ein ffocws yn gadarn ar ansawdd, darpariaeth a chyllid.

Rydym yn parhau i fod mewn "trefniadau arferol" ar gyfer pob agwedd arall ar ddarpariaeth y Bwrdd Iechyd.

Mae cyflwyno cynllun cytbwys rhwng 2015 a 2022 - ynghyd â'ch tosturi, eich ymrwymiad a'ch sgiliau eithriadol - yn dangos yn glir yr hanes gwych sydd gennym yn BIAP, sy'n rhoi hyder i ni fod gennym y sylfeini cywir i ddod drwy'r heriau hyn. Fel yr ydym wedi bod yn rhannu dros y misoedd diwethaf, mae gwaith hefyd ar y gweill i ddatblygu ein llwybr at gynaliadwyedd, byddwn yn parhau i ddatblygu hwn gan weithio'n agos gyda'n staff, partneriaid a'r cyhoedd i sicrhau bod gennym wasanaeth iechyd cynaliadwy ym Mhowys ar gyfer y dyfodol.

O ystyried costau cynyddol a’r galw cynyddol, mae angen i ni i gyd fod yn rhan o sgwrs agored a gonest gyda'r cyhoedd am sut olwg sydd ar y gwasanaeth iechyd a gofal yn y dyfodol er mwyn sicrhau cynaliadwyedd y GIG yng Nghymru.

Hayley Thomas, Chief Executive 

Mae rhagor o wybodaeth am y cyhoeddiad hwn a'r statws uwchgyfeirio ar gyfer pob bwrdd iechyd yng Nghymru ar gael o wefan Llywodraeth Cymru yn Datganiad Llafar: Sefydliadau GIG Cymru – diweddariad uwchgyfeirio (5 Tachwedd 2024) | LLYW.CYMRU