Penodi Is-gadeirydd ac Aelod Annibynnol o Fwrdd Iechyd Addysgu Powys
Rydym wrth ein bodd yn cyhoeddi penodiadau Rhiannon Beaumont-Wood i rôl yr Is-gadeirydd a Mick Giannasi yn Aelod Annibynnol o Fwrdd Iechyd Addysgu Powys
Mae Ysgrifennydd y Cabinet dros Iechyd a Gofal Cymdeithasol, Jeremy Miles, wedi cadarnhau penodiad Rhiannon Beaumont-Wood yn Is-gadeirydd, a Mick Giannasi yn Aelod Annibynnol o Fwrdd Iechyd Addysgu Powys.
Ynglŷn â Rhiannon
Ar hyn o bryd, mae Rhiannon yn Gyfarwyddwr Anweithredol Ymddiriedolaeth GIG Prifysgol Gwasanaeth Ambiwlans Cymru a Bwrdd Gofal Integredig GIG Dorset, ac mae hi'n aelod Cyngor Cofrestredig Cymru o fewn y Cyngor Nyrsio a Bydwreigiaeth.
Mae hi'n nyrs gofrestredig gyda 40 mlynedd o brofiad. Dechreuodd ei gyrfa yn Llundain ym 1981, gan fynd ymlaen i weithio mewn amryw o rolau mewn lleoliadau acíwt, gofal sylfaenol, cymunedol, diogelu, gofal cyn-ysbyty, ac iechyd y cyhoedd, gan arwain at gyfnod o ddeng mlynedd fel Cyfarwyddwr Gweithredol Ansawdd, Nyrsio a Gweithwyr Proffesiynol Perthynol i Iechyd yn Iechyd Cyhoeddus Cymru.
Yn dilyn ymddeoliad o'i rôl weithredol yn 2023, mae Rhiannon wedi canolbwyntio ar yrfa bortffolio, gan gynnwys ei swyddi anweithredol a'i rôl genedlaethol ar y Cyngor Nyrsio a Bydwreigiaeth.
Mae Rhiannon wedi bod yn Ymddiriedolwr i ddwy elusen yn y gorffennol, un yn cefnogi dioddefwyr a goroeswyr Cam-drin Domestig, a’r llall yn cefnogi arweinyddiaeth broffesiynol.
Mae hi hefyd yn gwnselydd integredig hyfforddedig ac yn hyfforddwr arweinyddiaeth proffesiynol ac uwch arweinydd wedi'i hyfforddi gan Meyler Campbell.
Dywedodd Rhiannon:
“Rwyf wrth fy modd ac yn teimlo’n anrhydeddus o gael fy mhenodi’n Is-gadeirydd Bwrdd Iechyd Addysgu Powys. Rwy'n edrych ymlaen yn fawr at weithio gyda'r Bwrdd, y sefydliad ehangach, a'n partneriaid, i gyfrannu at wella canlyniadau iechyd a gwella ansawdd bywyd pobl Powys.
“Rwy’n cydnabod bod y Bwrdd Iechyd yn wynebu heriau, fel pob un arall yng Nghymru, ond rwy’n credu’n gryf, drwy barhau i weithio mewn partneriaeth â’r rhai sy’n byw ac yn gweithio ym Mhowys, y gallwn wneud cynnydd cadarnhaol ac ystyrlon.
“Mae gen i gysylltiadau teuluol personol â Phowys sy’n ymestyn yn ôl dros sawl cenhedlaeth, ac rwy’n gwerthfawrogi’n fawr bopeth sydd gan y sir i’w gynnig a dyfeisgarwch ei phobl.”
Ynglŷn â Mick
Mae Mick Giannasi hefyd yn dod â phrofiad sylweddol ar draws arweinyddiaeth a thrawsnewid y sector cyhoeddus. Ymddeolodd o'r gwasanaeth heddlu yn 2011, ar ôl gyrfa nodedig a barodd 31 mlynedd, a dyfarnwyd Medal Heddlu'r Frenhines iddo am ei gyfraniad at blismona yn 2011. Yn dilyn ei ymddeoliad o'r Gwasanaeth Heddlu, penodwyd Mick gan Lywodraeth Cymru i weithredu fel Comisiynydd Cyngor Sir Ynys Môn, ac yna fe'i penodwyd yn Gadeirydd Bwrdd Ymddiriedolaeth GIG Gwasanaeth Ambiwlans Cymru o 2013 i 2018. Ar hyn o bryd mae'n gadeirydd Gofal Cymdeithasol Cymru, ac ymunodd â Bwrdd Iechyd Addysgu Powys fel Aelod Annibynnol ym mis Chwefror 2024 fel Aelod Annibynnol a benodwyd yn uniongyrchol.
Dywedodd Mick:
“Rwyf wrth fy modd o gael fy mhenodi’n Aelod Annibynnol o Fwrdd Iechyd Addysgu Powys. Mewn rolau blaenorol, rydw i wedi datblygu diddordeb cryf ym Mhowys a dealltwriaeth dda o'r hyn sydd ei angen i ddarparu gofal iechyd o ansawdd uchel mewn sir wledig. Cefais fy nenu at y rôl hon gan uchelgais wirioneddol y Bwrdd i wella canlyniadau iechyd, ei ffocws cryf ar anghenion cymunedau Powys, a'r gwerth gwirioneddol y mae'n ei roi ar ei weithlu. Rwy'n edrych ymlaen at weithio gyda chydweithwyr, partneriaid a staff i chwarae fy rhan i gyflawni'r uchelgeisiau hynny.”
Croeso gan Carl
Dywedodd Dr Carl Cooper, Cadeirydd y Bwrdd:
“Rwyf wrth fy modd bod Rhiannon wedi’i phenodi i rôl Is-gadeirydd a Mick yn Aelod Annibynnol o Fwrdd Iechyd Addysgu Powys. Rydym ar adeg bwysig yn ein taith drawsnewid wrth i ni barhau i sefydlu cynlluniau ar gyfer dyfodol gwasanaethau iechyd o ansawdd uchel, diogel, amserol a chynaliadwy ym Mhowys. Bydd gyrfaoedd nodedig Rhiannon a Mick ynghyd â'u sgiliau, profiad a gwybodaeth ehangach yn cryfhau a chyfoethogi llywodraethiant ein sefydliad ymhellach.
“Rwy’n edrych ymlaen at weithio gyda’r ddau ohonyn nhw wrth i ni barhau i ddatblygu arweinyddiaeth weladwy, dosturiol a chydweithredol o fewn y Bwrdd ac ochr yn ochr â’n holl gydweithwyr a phartneriaid.”
Ynglŷn â'r Bwrdd Iechyd a'r broses Penodiadau Cyhoeddus
MMae'r Bwrdd yn bodoli i oruchwylio'r system lywodraethu a rheoli, gan gynnwys rheoli risg. Mae hyn yn golygu bod y bwrdd yn gwneud penderfyniadau ynghylch sut mae pethau'n rhedeg a sut i gadw staff a chleifion yn ddiogel. Maent yn gwneud hynny drwy gyfarfod yn gyhoeddus fel Bwrdd, yn ogystal ag mewn pwyllgorau sy'n canolbwyntio ar wahanol feysydd o weithgareddau'r bwrdd iechyd, megis ansawdd, cyllid, perfformiad, y gweithlu, cynllunio ac iechyd y boblogaeth.
Mae'r Gweinidog wedi penodi Rhiannon Beaumont-Wood i Fwrdd Iechyd Addysgu Powys am gyfnod o bedair blynedd o fis Chwefror 2026, a Mick Giannasi am gyfnod o bedair blynedd o 1 Hydref 2025. Mae'r penodiadau wedi'u gwneud yn unol â'r Cod Llywodraethu ar benodiadau cyhoeddus.
Mae rhagor o wybodaeth am Fwrdd Iechyd Addysgu Powys ar gael o wefan y Bwrdd Iechyd.
Mae rhagor o wybodaeth am benodiadau cyhoeddus yng Nghymru ar gael o wefan Llywodraeth Cymru