Uned Pelydr-X Y Drenewydd i ailagor ar Ebrill 4
Bydd yr uned pelydr-X yn Ysbyty Sir Drefaldwyn yn y Drenewydd yn ailagor ddydd Gwener Ebrill 4ydd ar ôl gosod offer digidol newydd.
Tra bod y gwaith gosod hwn yn digwydd, mae cleifion sydd angen pelydrau-X yn cael eu hailgyfeirio at ysbyty cymunedol arall y bwrdd iechyd.
Mae'r gwaith yn rhan o raglen gwerth £1.7m a ariennir gan Lywodraeth Cymru i osod unedau pelydr-X newydd mewn ysbytai cymunedol. Mae'r unedau newydd yn cynhyrchu delweddau yn gyflymach ac yn gliriach ac mae disgwyl i'r holl osodiadau gael eu gorffen yn y Gwanwyn.
Yn ogystal â darparu canlyniadau cyflymach a diagnosis mwy cywir, bydd y peiriannau newydd hefyd yn helpu lleihau amseroedd aros ar gyfer pelydrau-X. Bydd hyn yn ei dro yn gwella mynediad at driniaeth. Mae'r peiriannau pelydr-X newydd hyn yn defnyddio dos is o ymbelydredd na'r peiriannau presennol, sydd yn ei dro yn lleihau amlygiad ymbelydredd i gleifion.
Dechreuodd y cam cyntaf ym mis Tachwedd ac mae'r Trallwng, Llandrindod ac Ystradgynlais eisoes wedi ailagor. Mae disgwyl i Aberhonddu ailagor yn yr wythnosau nesaf.
Dywedodd Claire Madsen, Cyfarwyddwr Gweithredol Gweithwyr Proffesiynol Perthynol i Iechyd a Gwyddorau Iechyd ym Mwrdd Iechyd Addysgu Powys: “Unwaith eto, hoffwn ddiolch i bobl am eu hamynedd wrth i ni osod yr offer newydd hwn. Rydym eisoes yn gweld gwasanaeth llawer gwell yn yr unedau sydd wedi ailagor ac rwy'n siŵr y bydd hyn yn cael ei ailadrodd yn y Drenewydd ac Aberhonddu hefyd.
Ychwanegodd Ms Madsen: "Hoffwn atgoffa pawb, tra bod yr adrannau pelydr-X hyn ar gau, na fydd gwasanaethau radioleg eraill yn yr ysbytai hyn - fel uwchsain - yn cael eu heffeithio ac y byddant yn parhau i fod ar gael. Dylwn hefyd nodi, os oes gennych mân anaf yna rydym yn parhau i'ch annog chi i ffonio'n gyntaf am gyngor clinigol. Bydd ein tîm clinigol yn gallu rhoi cyngor dros y ffôn i'ch helpu chi gael y driniaeth sydd ei hangen arnoch."
Rhifau ffôn yr Unedau Mân Anafiadau yn yr ysbytai yw:
- Aberhonddu: 01874 615800
- Llandrindod: 01597 828735
- Y Trallwng: 01938 558919 a 558931
- Ystradgynlais: 01639 844777
Llun: Yr uned pelydr-X yn Ystradgynlais oedd y diweddaraf i ailagor. Mae'r Uwch Radiograffydd Patience Mbaulu yn y llun yn yr uned sydd newydd ei hadnewyddu.