Wythnos Lles y Byd - mae gofalu am eich babi yn dechrau trwy ofalu am eich hunain.
Rydych chi wedi blino'n lân, rydych chi'n gorwynt o emosiynau ac nid yw'ch beichiogrwydd na'ch dull rhianta newydd yn gweithio yn union sut roeddech chi wedi dychmygu. Rydych chi’n ceisio bod yn hapus - oherwydd dyna sut mae pawb yn disgwyl i chi deimlo - ond mewn gwirionedd rydych chi’n poeni am sut ar y ddaear rydych chi’n mynd i ymdopi.
Y gwir yw, gall fod yn gwbl normal teimlo dan straen, yn orbryderus neu'n isel yn ystod y cyfnod amenedigol. Ond peidiwch â phoeni, mae help wrth law: cymorth sy'n siwtio chi a'ch amserlen; cymorth sydd ar gael 24/7 yng nghysur eich cartref eich hun; cymorth a fydd yn eich dysgu sgiliau parhaol ar gyfer gofalu am eich iechyd meddwl nawr ac yn y dyfodol.
Mae SilverCloud Cymru yn wasanaeth cymorth iechyd meddwl ar-lein am ddim a ddarperir gan GIG Cymru. Gall unrhyw un 16+ oed sy'n byw yng Nghymru gofrestru heb atgyfeiriad meddyg teulu. Mae cynnwys rhaglen Gofod i Les Amenedigol wedi’i ddylunio’n benodol i famau beichiog a thadau, rhieni newydd, menywod sy’n benthyg eu croth, rhai sy’n rhoi gofal a phobl sy'n mabwysiadu plentyn. Nid oes rhestr aros, a gallwch ei chyrchu ar unrhyw gyfrifiadur neu ddyfais symudol, gan gynnwys eich ffôn, unrhyw bryd yn ystod beichiogrwydd a hyd at flwyddyn ar ôl i'ch babi gael ei eni.
Bydd gennych fynediad at y rhaglen a'i holl gynnwys am flwyddyn pan fyddwch yn cofrestru, a bydd cefnogwr SilverCloud hyfforddedig yn cael ei ddyrannu i chi am 12 wythnos. Byddant yn edrych ar eich cynnydd wrth i chi weithio drwy'r chwe modiwl ar eich cyflymder eich hun, gan roi adborth ysgrifenedig bob pythefnos i chi. Gallant hefyd eich cyfeirio at gymorth ychwanegol os ydynt yn teimlo bod ei angen arnoch.
Fe welwch fod y rhaglen yn normaleiddio pa mor anodd y gall hyn fod, o'r cychwyn cyntaf. Efallai ei bod yn teimlo'n eithaf tabŵ i fod yn agored am eich emosiynau, neu gyfaddef eich bod yn cael trafferth neu ddim yn mwynhau amser gyda'ch babi, ond mae Gofod i Les Amenedigol yn rhoi lle diogel i chi fynegi'r teimladau hynny, ac yn chwalu rhai o heriau gwahanol y cyfnod hwn yn bwyntiau hylaw i chi weithio arnynt.
Er enghraifft, mae'n sôn am fod yn hyblyg o amgylch amseroedd cysgu, gan eich grymuso i gamu'n ôl a chreu eich arferion eich hun yn seiliedig ar yr hyn sy'n gweithio i chi, yn hytrach na'r hyn rydych chi'n meddwl y mae pawb yn ei ddisgwyl gennych chi.
Fel rhan o’r rhaglen mae rhywfaint o gyfeirio sy'n dangos sut y gallwch adeiladu cymuned o'ch cwmpas, felly nid ydych chi'n teimlo mor unig. Mae yna straeon personol gan rai sy’n rhoi gofal yno, felly gallwch glywed eu profiadau heb o reidrwydd fod yn agored am eich stori eich hun, ac mae modiwl ar ddysgu sut i herio hwyliau isel trwy weithgareddau syml i chi ac i'ch babi.
Mae'r holl offer a thechnegau ar gyfer rheoli teimladau fel gorbryder neu iselder wedi'u cynllunio gyda'r cyfnod amenedigol mewn golwg, gan gydnabod ei ofynion penodol iawn - nid yw bob amser yn achos syml o godi a mynd allan am dro i wneud i chi deimlo'n well pan fyddwch yn colli cwsg a bod gennych fabi newydd-anedig i ofalu amdano.
Yn sicr, nid yw’n addas i bawb, felly mae hyn yn ymwneud â dod o hyd i'r hyn sy'n gweithio orau yn eich sefyllfa, gan gofio bob amser bod gofalu am eich babi yn dechrau trwy ofalu am eich hunain.
Jenna West, cydlynydd CBT ar-lein, GIG Cymru
Lawrlwythwch y canllaw Gofod i Les Amenedigol yma.
Os oes angen cymorth arnoch ac yn byw yng Nghymru, neu os ydych wedi cofrestru gyda meddygfa yng Nghymru, cofrestrwch i'r gwasanaeth yma.
Rhyddhawyd: 24/06/2024