Y Trallwng yn croesawu cydweithwyr o India i dîm yr ysbyty
Mae recriwtiaid diweddaraf ysbyty'r Trallwng wedi bod yn ymgartrefu'n dda ar ôl dechrau eu swyddi nyrsio cofrestredig newydd. Mae Powys wedi cael nifer o garfannau nyrsio a addysgwyd yn rhyngwladol sydd wedi ymuno â'r bwrdd iechyd i ddarparu gofal nyrsio i bobl leol.
Mae'r nyrsys cofrestredig Aiswarya Kumari, Manpreet Kaur, Sruthy Jiji a Remya Elavumkal-John i gyd wedi dechrau gweithio ar Ward Maldwyn yn Ysbyty Coffa Victoria’r dref.
Dywedodd Nyrs Aiswarya, sy'n wreiddiol o dalaith Kerala yn ne India: "Rydyn ni wedi cael croeso cynnes gan y gymuned leol - mae'r ardal yma yn lle braf, saff i fyw; ardal dawel a chymwynasgar."
A chanmolodd Rheolwr y Ward, Donna Jarman y recriwtiaid newydd: "Maen nhw wedi bod gyda ni ers Ebrill 2023 ac wedi setlo'n dda iawn - maen nhw'n ychwanegiad gwych i'r tîm ac mae’n bleser gweithio gyda nhw."
Dywedodd Nyrs Manpreet, sy'n dod o dalaith Punjab India: "Rydyn ni wedi sylwi bod nyrsio ysbyty cymunedol yn wahanol mewn sawl ffordd i'm cartref. Mewn ysbytai cymunedol, byddai llawdriniaethau'n cael eu cynnal, er enghraifft hysterectomïau a thoriad Cesaraidd, ond yma rwy'n sylwi ein bod yn darparu gofal i lawer mwy o bobl â dementia."
Ac eglurodd Nyrs Sruthy, sydd hefyd yn wreiddiol o Kerala, y byddai meddyg teulu ym mhob ysbyty cymunedol bob amser 24/7 yn ei hardal gartref.
Maen nhw wedi sylweddoli bod trefniadau rhyddhau yn fwy cymhleth yng Nghymru hefyd: "Fel arfer y teulu sy'n mynd i fod yn edrych ar ôl y claf ar ôl iddyn nhw adael, felly sgwrs gyda'r teulu am ôl-ofal y cleifion yn hytrach na'r broses sydd gennym ni yma," meddai Nyrs Aiswarya.
Nyrsys y Trallwng yw'r ail glwstwr o nyrsys a addysgir yn rhyngwladol i ymuno â'r bwrdd iechyd yng Ngogledd Powys. Mae'r cam recriwtio diweddaraf wedi gweld nyrsys yn cyrraedd y Drenewydd gyda chynlluniau ar gyfer mynd i Fachynlleth yn ddiweddarach eleni.
Dywedodd Zoe Clent Rheolwr Gwasanaethau Cymunedol Gogledd Powys: "Mae'n wych gweld ein cydweithwyr yn ymuno â ni mewn ysbytai cymunedol BIAP. Maen nhw’n dod â chyfoeth o wybodaeth ac arbenigedd nyrsio ac mae pob carfan yn caniatáu cefnogaeth barhaus i'n nyrsys tramor presennol a fydd yn cefnogi cadw'r aelodau staff gwerthfawr hyn."
Llun: Aelodau newydd o'r tîm yn y Trallwng; (O'r chwith) Nyrsys Cofrestredig Aiswarya, Manpreet a Sruthy. (Doedd Nyrs Remya ddim ar gael ar gyfer y llun.)