Diwrnod Iechyd Meddwl y Byd: Carreg filltir 41mil atgyfeiriad at wasanaeth iechyd meddwl digidol GIG Cymru

Mae gwasanaeth cymorth iechyd meddwl ar-lein GIG Cymru wedi cyrraedd 41,000 o atgyfeiriadau ers ei dreialu chwe blynedd yn ôl.

Mae'r Gwasanaeth Therapi Gwybyddol Ymddygiadol (CBT) Ar-lein yn cael ei bweru gan y platfform iechyd meddwl digidol SilverCloud®.

Treialwyd y cymorth am ddim yn llwyddiannus ym Mhowys ym mis Mai 2018 cyn ehangu ledled Cymru mewn ymateb i bandemig COVID.

Mae newyddion y datblygiad diweddaraf yn cyd-daro â Diwrnod Iechyd Meddwl y Byd ac yn dilyn cyflwyno llwybrau atgyfeirio uniongyrchol gydag adrannau iechyd ledled y genedl.

Dywedodd rheolwr y prosiect Fionnuala Clayton: “Ar Ddiwrnod Iechyd Meddwl y Byd, cawn ein hatgoffa bod arloesiadau digidol fel SilverCloud® yn darparu llwybr at gefnogaeth, cysylltiad a gobaith - yn yr achos hwn i ddegau o filoedd o bobl.

“Mae hwn yn wasanaeth sy’n canolbwyntio ar atal yn gyntaf, ac rydym yn ddiolchgar bod adrannau ledled Cymru yn rhannu ein gweledigaeth ar gyfer cymorth iechyd meddwl cynnar a hygyrch.

“Gyda’n gilydd, rydym yn helpu pobl cymryd rheolaeth o’u lles cyn iddynt gyrraedd pwynt argyfwng.”

Mae gan bob un o saith bwrdd iechyd Cymru lwybrau gofal ar waith bellach, gydag ymarferwyr sy'n gweithio mewn meysydd fel iechyd meddwl plant a phobl ifanc, gofal amenedigol, a gofal sylfaenol lleol yn gallu atgyfeirio cleifion.

Yn ogystal, gall unrhyw un dros 16 oed hunanatgyfeirio – yn rhad ac am ddim – heb weld meddyg teulu.

Mae'r gwasanaeth, sy'n cael ei ariannu gan Lywodraeth Cymru, wedi'i leoli ym Mwrdd Iechyd Addysgu Powys.

Mae rhaglenni rhyngweithiol SilverCloud yn dysgu sgiliau ymdopi ymarferol ar gyfer materion iechyd meddwl ysgafn i gymedrol a gellir eu cyrchu ar-lein unrhyw bryd, unrhyw le trwy unrhyw ddyfais symudol, llechen, gliniadur neu ddyfais bwrdd gwaith.

Darperir cefnogaeth drwy'r rhaglenni 12 wythnos, ond gall defnyddwyr gwasanaeth gweithio trwyddynt ar drywydd sy’n gyfleus iddyn nhw a chyrchu deunydd ac ymarferion hyd yn oed ar ôl cwblhau cyrsiau.

Caiff cynnydd ei fonitro gan ymarferwyr hyfforddedig, sy'n darparu adborth bob pythefnos ac yn gallu uwchgyfeirio achosion mwy difrifol i gyrchu cymorth pellach.

O'r 41,000 o atgyfeiriadau, mae bron i 24,000 wedi bod yn oedolion sy'n ceisio cymorth gyda gorbryder, iselder neu gyfuniad o'r ddau.

Mae dros 1,000 wedi ceisio cymorth gyda chwsg, tra bod 2,600 wedi cael cymorth ar gyfer straen.

Mae rhaglenni pwrpasol hefyd ar waith i gefnogi myfyrwyr, yn ogystal â phlant, pobl ifanc a'u rhieni neu ofalwyr.

Trodd Louise Hands, 58 oed, at y gwasanaeth CBT ar-lein am gymorth i reoli gorbryder yn ystod cyfnod o salwch ym mis Ebrill eleni.

Dywedodd Louise, o Brestatyn, Sir Ddinbych: “Roeddwn i’n teimlo fel petawn i’n colli fy annibyniaeth ac roedd fy meddyliau’n rasio’n gyson.

“Teimlais fod yn rhaid i mi wneud rhywbeth i helpu fy hun – a SilverCloud® oedd yr ateb. Roedd mor gadarnhaol ac mor hawdd i'w lywio.

“Roedd cael cefnogwr yn cysylltu â mi bob pythefnos yn cadarnhau sut roeddwn i’n teimlo, ac roeddwn i wrth fy modd â’r cyfleustra – doeddwn i ddim wedi fy nghyfyngu i apwyntiad ar ddyddiad ac amser penodol, gallwn i gael mynediad ato pryd bynnag roeddwn i eisiau.

“Rwy’n dal i fynd i mewn ac allan nawr, ac rwy’n ymarfer myfyrdod yn rheolaidd. Rydw i'n fwy ymwybodol o ganlyniad, ac mae'r meddyliau rasio hynny wedi diflannu.

“Mae SilverCloud® wedi fy helpu i ddod i gysylltiad â fy nheimladau yn hytrach na gadael i bethau gronni.

“Rwy’n gallu sylwi ar yr hyn rwy’n ei deimlo, a deall pam rwy’n ei deimlo – ac unwaith i chi sylwi arno, rydych chi wedi’i bopio! Dydych chi ddim yn ei gario'n fewnol mwyach.

“Rydw i wedi ennill cymaint.”

I ddysgu mwy am SilverCloud®, ewch i: https://biap.gig.cymru/gwasanaethau/gwasanaethau-iechyd-meddwl-oedolion-a-phobl-hyn/tyg-ar-lein-silvercloud/

Hunanatgyfeiriwch nawr: https://nhswales.silvercloudhealth.com/signup/

Cyhoeddwyd: 10/10/2025