Neidio i'r prif gynnwy

Wythnos Ymwybyddiaeth Straen 2025: Gafael yn awenau straen yn y gweithle

Testun yn Darllen:Gafael yn awenau straen yn y gweithle. Delwedd o ddyn a menyw mewn amgylchedd swyddfa, mae menyw yn chwerthin

Nid yw ychydig o straen yn beth drwg - mae'n ymateb naturiol i sefyllfaoedd heriol, a ffordd y corff o ymateb i bwysau, gan sbarduno newidiadau corfforol ac emosiynol sy'n ein helpu ni ymdopi.

Ond pan fydd straen yn dod yn gronig neu'n llethol, gall effeithio'n negyddol ar iechyd, lles a pherfformiad.

Gallai ymddangos fel gorbryder, anniddigrwydd, blinder, neu anhawster canolbwyntio, neu hyd yn oed symptomau corfforol fel cur pen a thensiwn cyhyrau.

Os na chaiff ei reoli, gall straen arwain at orflinder, absenoliaeth, a phroblemau iechyd meddwl hirdymor.

Mae wythnos ymwybyddiaeth straen eleni yn canolbwyntio ar reoli straen yn y gweithle, gyda ffocws ar sut y gall arweinwyr greu amgylcheddau gwaith meithringar sy'n caniatáu i weithwyr ffynnu.

Gyda hynny mewn golwg, dyma bum cam strategol y gall cyflogwyr eu cymryd i reoli straen a chefnogi lles staff:

  1. Gwneud cydbwysedd rhwng bywyd a gwaith yn rhan o ddiwylliant eich sefydliad

Anogwch weithwyr i gymryd seibiannau rheolaidd, defnyddio gwyliau blynyddol, a datgysylltu y tu allan i oriau gwaith. Dylai arweinwyr fodelu'r ymddygiad hwn i ddangos bod lles yn flaenoriaeth, nid yw’n beth moethus.

  1. Sicrhau bod cymorth iechyd meddwl ar gael yn hawdd

Darparwch lwybrau clir at adnoddau iechyd meddwl, gan gynnwys cwnsela, diwrnodau iechyd meddwl, ac offer lles digidol fel SilverCloud® Cymru. Cyfathrebwch yn rheolaidd beth sydd ar gael a normaleiddiwch ymddygiad o geisio cymorth.

  1. Cynnig gweithio'n hyblyg

Gall hyblygrwydd helpu lleihau straen yn fawr. Boed yn gweithio o bell, oriau hyblyg, neu wythnosau cywasgedig, mae rhoi rheolaeth i weithwyr dros eu hamserlenni - lle bo modd - yn eu helpu nhw reoli cyfrifoldebau personol a lleihau pwysau.

  1. Creu lle ac amser ar gyfer sgyrsiau agored

Ceisiwch feithrin gweithle diogel yn seicolegol lle mae gweithwyr yn teimlo'n gyfforddus yn trafod straen ac iechyd meddwl. Gall hyfforddiant, gweithdai a rhwydweithiau cymorth cyfoedion helpu chwalu stigma a meithrin gwydnwch.

  1. Cydnabod a dathlu llwyddiannau a chyfraniadau gweithwyr

Mae cydnabod ymdrech a chyflawniad yn hybu morâl ac yn lleihau straen. Nid oes rhaid i gydnabyddiaeth fod yn fawreddog - mae gwerthfawrogiad syml a chyson yn mynd yn bell i greu amgylchedd gwaith cadarnhaol.

Cymorth gan GIG Cymru

Os ydych chi'n awyddus i wella'ch cynnig lles yn y gweithle, mae GIG Cymru yn darparu mynediad am ddim at SilverCloud®, sef cyfres o raglenni iechyd meddwl ar-lein. Mae'r rhain yn cynnwys cefnogaeth dan arweiniad ar gyfer straen, gorbryder, hwyliau isel, pryderon ariannol a mwy, heb fod angen atgyfeiriad gan feddyg teulu.

Mae SilverCloud ® yn defnyddio technegau Therapi Gwybyddol Ymddygiadol sydd wedi'u profi'n glinigol i helpu defnyddwyr herio meddwl negyddol a chymryd camau cadarnhaol.

 

Cyhoeddwyd: 03/11/2025