Annog y cyhoedd i'n Helpu Ni i'ch Helpu wrth i'r pwysau ar wasanaethau iechyd a gofal barhau

Mae’r gwasanaethau iechyd a gofal ledled Cymru a Gorllewin Canolbarth Lloegr o dan bwysau eithriadol. Mae arweinwyr iechyd a gofal yn annog pobl i wneud eu rhan i helpu cefnogi gwasanaethau drwy ddewis y gwasanaeth gorau i'w hanghenion, os ydynt yn sâl neu wedi'u hanafu yn ystod y cyfnod prysur hwn.

Mae niferoedd Covid-19 cynyddol, galw mawr am wasanaethau a heriau parhaus gyda salwch yn y gweithlu i gyd yn cyfrannu at bwysau ar y system. O ganlyniad, bydd angen i'r system iechyd a gofal gymryd camau ychwanegol i flaenoriaethu gofal brys a chynnal gwasanaethau diogel i gleifion.

Bydd cleifion sydd â'r lefel uchaf o angen yn cael eu blaenoriaethu, gallai hyn olygu bod rhai gwasanaethau sydd ddim yn rhai brys yn cael eu gohirio neu eu haildrefnu. Parhewch i fynd i'ch apwyntiad yn ôl yr arfer oni bai bod rhywun yn cysylltu â chi i aildrefnu.

Mae trigolion Powys yn defnyddio eu gwasanaethau ysbyty acíwt o fyrddau iechyd cyfagos yng Nghymru ac Ymddiriedolaethau GIG cyfagos yn Lloegr. Mae pob ysbyty yn apelio ar gymunedau lleol i ond ddod i Unedau Damweiniau ac Achosion Brys am gyflyrau ac anafiadau sy'n peryglu bywyd. Rydym yn eich annog i beidio â ffonio 999 na mynychu Unedau Damweiniau ac Achosion Brys oni bai ei fod yn argyfwng: Mae gwefan GIG 111 ar-lein yn gallu eich helpu i ddod o hyd i ble i gael cymorth a chefnogaeth.

Mae fferyllwyr lleol yn lle gwych i ddechrau ar gyfer mân anhwylderau a chyngor hunan ofal. Trwy'r Cynllun Anhwylderau Cyffredin gallwch gael cyngor a thriniaeth ar gyfer amrywiaeth o anhwylderau cyffredin heb orfod gwneud apwyntiad meddyg teulu.

Mae Unedau Mân Anafiadau y Bwrdd Iechyd, wedi’u lleoli yn Aberhonddu, Llandrindod, Y Trallwng ac Ystradgynlais, helpu i roi cyngor a thriniaeth ar gyfer mân anafiadau amrywiol fel ysigiadau a straen. Ffoniwch yn gyntaf os gallwch fel y gall ein nyrsys arbenigol roi cyngor i chi dros y ffôn, trefnu apwyntiad os oes angen, neu eich cyfeirio at wasanaeth arall os yw'n briodol. Mae apwyntiadau galw heibio ar gael i bobl na allant ddefnyddio'r ffôn i gysylltu â ni.

Mae mân wasanaethau anafiadau hefyd ar gael gan lawer o feddygfeydd ar draws y sir. Gwiriwch gyda'ch meddygfa deulu leol am fanylion..

Os oes gennych berthynas neu anwylyn yn yr ysbyty sy'n ddigon iach i fynd adref, ond sy'n aros i gael eu rhyddhau gyda gofal cartref a chymorth iechyd cymunedol, efallai y gallwch eu helpu i fynd adref yn gynt os gallwch chi a'ch teulu eu cefnogi gartref.

Rydym yn gweithio'n eithriadol o galed i sicrhau bod pobl yn cael eu cadw'n ddiogel, a hoffem sicrhau'r cyhoedd bod ein gwasanaethau yn parhau ar agor i unrhyw un sydd eu hangen er gwaethaf yr heriau a wynebir. Helpwch ni i'ch helpu chi a'r rhai rydych chi'n eu caru.

Dyma sut y gallwch helpu:

Ystyriwch a oes angen i chi fynychu adran frys neu ffonio 999. Os nad yw'n argyfwng sy'n bygwth bywyd mae yna lefydd eraill i ofyn am help oddi wrthynt.
Defnyddiwch GIG 111 ar-lein os ydych angen cyngor neu driniaeth feddygol yn gyflym.
Mae Unedau Mân Anafiadau yma i helpu gydag anafiadau sydd angen sylw ar frys ond sydd ddim yn gritigol nac yn bygwth bywyd. Ffoniwch ein hunedau yn Aberhonddu, Llandrindod, Y Trallwng ac Ystradgynlais yn y lle cyntaf. Fe allai eich meddygfa hefyd gynnig gwasanaeth mân anafiadau.
Codwch ffrindiau neu berthnasau o'r ysbyty cyn gynted ag y byddant yn ddigon iach i gael eu rhyddhau ac mae'r ysbyty wedi cysylltu â chi. Mae hyn yn rhyddhau gwely i gleifion eraill sydd eu hangen.
Defnyddiwch eich fferyllydd lleol ar gyfer mân gyflyrau fel anhwylder stumog, cur pen, brech ar y croen ac i leddfu peswch ac annwyd. Dewch o hyd i fferyllfa yn eich ardal chi: Dod o hyd i Fferyllfa
Dylech gael eich brechu yn erbyn Covid-19 a'r ffliw os ydych yn gymwys. Bydd brechu yn amddiffyn nid yn unig eich hun ond eraill o'ch cwmpas.
Arhoswch gartref ac yn arbennig peidiwch ag ymweld ag ysbytai os oes gennych symptomau salwch heintus fel Covid-19, ffliw neu norofeirws (a elwir y byg chwydu'r gaeaf). Cofiwch - dwylo, wyneb, ymbellhau.
Am bryderon am haint Streptococol Grŵp A, gweler y canllawiau diweddaraf yma: https://biap.gig.cymru/strep-a
Mae’r llinell gymorth iechyd meddwl C.A.L.L i Gymru yn cynnig cefnogaeth emosiynol a gwybodaeth. Ffoniwch 0800 132 737 neu tecstiwch HELP i 81066.

Mae rhagor o wybodaeth ar gael ar y ddolen hon am sut i Helpu Ni i’ch Helpu Chi.

Chwiliwch am y newyddion diweddaraf o'ch Uned Damweiniau ac Achosion Brys agosaf yma: Ysbytai Cyfagos

Cyhoeddi ar 03/01/2023